ក្រសួងការពារជាតិបាននិយាយកាលពីថ្ងៃពុធ ទី១៤ ខែមករា ថា ប្រទេសដាណឺម៉ាក នឹងបង្កើនវត្តមានយោធារបស់ខ្លួននៅដែនដីហ្គ្រីនលែន«ចាប់ពីថ្ងៃនេះតទៅ» មុនពេលកិច្ចចរចាមានការប្រឈមខ្ពស់ ចាប់ផ្តើមនៅទីក្រុងវ៉ាស៊ីនតោន ជុំវិញការគំរាមកំហែងរបស់ប្រធានាធិបតីសហរដ្ឋអាមេរិក លោក Donald Trump ក្នុងការយកមកគ្រប់គ្រងដែនដីកោះនៅមហាសមុទ្រអាកទិក។

ក្រសួងការពារជាតិដាណឺម៉ាក បាននិយាយនៅក្នុងសេចក្តីថ្លែងការណ៍ថា «កងកម្លាំងប្រដាប់អាវុធរបស់ប្រទេសដាណឺម៉ាក ចាប់ពីថ្ងៃនេះតទៅនឹងដាក់ពង្រាយសមត្ថភាពនិងអង្គភាពពាក់ព័ន្ធទៅនឹងសកម្មភាពសមយុទ្ធ។ នៅពេលខាងមុខ នេះនឹងនាំឱ្យមានការកើនឡើងវត្តមានយោធានៅក្នុងនិងជុំវិញដែនដីហ្គ្រីនលែន រួមមានយន្តហោះ នាវា និងទាហាន ព្រមទាំងទាំងមកពីសម្ព័ន្ធយោធាណាតូផងដែរ»។

ចាប់តាំងពីវិលត្រឡប់ទៅកាន់តំណែងវិញមួយឆ្នាំកន្លងទៅនេះ លោក Trump បាននិយាយដដែលៗថា សហរដ្ឋអាមេរិកចាំបាច់ត្រូវគ្រប់គ្រងដែនដីកោះនៅតំបន់អាកទិកដ៏ធំមួយនេះ ជាកោះនៅតំបន់មហាសមុទ្រអាកទិកជាយុទ្ធសាស្ត្រ និងមានប្រជាជនរស់នៅតិច ដោយសារតែហេតុផល «សន្តិសុខជាតិ»។

លោកបានចោទប្រកាន់ប្រទេសដាណឺម៉ាកថា មិនយកចិត្តទុកដាក់ចំពោះសន្តិសុខនៅក្នុងនិងជុំវិញដែនដីហ្គ្រីនលែន និងបាននិយាយថា ដែនដីស្វយ័តរបស់ប្រទេសដាណឺម៉ាក «មានសារៈសំខាន់» សម្រាប់ប្រព័ន្ធការពារដែនអាកាស និងមីស៊ីល Golden Dome របស់លោកដែលបានគ្រោងទុក។

លោកបានជំរុញឱ្យសម្ព័ន្ធយោធាណាតូគាំទ្រគោលបំណងរបស់ទីក្រុងវ៉ាស៊ីនតោន។ នាយករដ្ឋមន្ត្រី ដាណឺម៉ាក លោកស្រី Mette Frederiksen បានព្រមានថា ការវាយប្រហាររបស់សហរដ្ឋអាមេរិកទៅលើសម្ព័ន្ធមិត្តណាតូ នឹងបញ្ចប់សម្ព័ន្ធភាព។