កម្មករដឹកជញ្ជូននៅប្រទេសប៉េរូ បានធ្វើកូដកម្មលើកដំបូងនៅឆ្នាំនេះកាលពីថ្ងៃពុធ ទី១៤ ខែមករា ដើម្បីទាមទារការការពារពីឧក្រិដ្ឋកម្មដែលកំពុងកើនឡើង ខណៈប្រធានាធិបតី លោក Jose Jeri បានប្រកាសពីវិធានការថ្មីៗដើម្បីប្រយុទ្ធប្រឆាំងទៅនឹងកង្វះសន្តិសុខលើការដឹកជញ្ជូនសាធារណៈ។

អ្នកដំណើរបានកកស្ទះនៅក្នុងរថយន្តក្រុងមួយចំនួនដែលដំណើរការនៅពេលព្រឹកក្នុងទីក្រុងលីម៉ា ខណៈសហជីពអ្នកបើកបររថយន្តដឹកជញ្ជូនជាច្រើនបានគាំទ្រកូដកម្ម។ គ្មានឧប្បត្តិហេតុធំៗណាមួយត្រូវបានរាយការណ៍ទេ។ ប្រធានាធិបតី លោក Jose Jeri បានទៅជិតក្រុមអ្នកតវ៉ាដើម្បីផ្តល់ព័ត៌មានដល់ពួកគេអំពីក្រឹត្យដែលត្រូវអនុវត្តចាប់ពីថ្ងៃព្រហស្បតិ៍ ទី១៥ ខែមករានេះ ក្នុងគោលបំណងពង្រឹងសន្តិសុខលើការដឹកជញ្ជូនសាធារណៈ។

ប្រព័ន្ធផ្សព្វផ្សាយប៉េរូ បានរាយការណ៍ថា ក្នុងអំឡុងចុងសប្តាហ៍ដំបូងនៃឆ្នាំ២០២៦ មនុស្ស១០នាក់ ត្រូវបានសម្លាប់នៅក្នុងរដ្ឋធានី ខណៈស្ថានភាពរដ្ឋក្នុងគ្រាអាសន្នលើកទីបីរបស់លោក Jeri នៅតែមាននៅក្នុងទីក្រុងលីម៉ា(Lima) និងខេត្ត Callao។

លោក Jeri បានស្បថចូលកាន់តំណែងកាលពីក្នុងខែតុលា ដោយសន្យាថានឹងដោះស្រាយបញ្ហាឧក្រិដ្ឋកម្មដែលជាអាទិភាពចម្បង។ នៅឆ្នាំ ២០២៥ លោកបានប្រឈមនឹងការតវ៉ាធំៗដែលអំពាវនាវដោយក្រុមសង្គមស៊ីវិល និងយុវជនមកពីអ្វីដែលគេហៅថាក្រុម Generation Z ដោយទាមទារវិធានការប្រឆាំងឧក្រិដ្ឋកម្មកំពុងកើនឡើង។