លោកស្រី Delcy Rodriguez ប្រធានាធិបតីស្តីទីរបស់ប្រទេសវ៉េណេស៊ុយអេឡា បាននិយាយកាលពីថ្ងៃពុធ ទី១៤ ខែមករា ថា អ្នកជាប់ពន្ធនាគារចំនួន២០៤នាក់នឹងត្រូវបានដោះលែង ទោះបីជាវាមិនច្បាស់ថានៅពេលណាក៏ដោយ។ លោកស្រី Rodriguez បានធ្វើការប្រកាសបែបនេះ នៅក្នុងសន្និសីទសារព័ត៌មានមួយពីវិមាន Miraflores ក្នុងទីក្រុង Caracas។

យោងតាមក្រុមតស៊ូមតិនិងក្រុមគ្រួសារបានឲ្យដឹងថា ការដោះលែង ដែលត្រូវបានប្រកាសកាលពីសប្តាហ៍មុន កំពុងដំណើរការយ៉ាងយឺត។ ពួកគេបាននិយាយថា អង្គការសិទ្ធិមនុស្សបានប៉ាន់ប្រមាណថា មានអ្នកទោសនយោបាយប្រហែល៨០០នាក់នៅក្នុងប្រទេស ប៉ុន្តែមួយចំនួនប៉ុណ្ណោះត្រូវបានដោះលែង។

រហូតមកដល់ពេលនេះ អ្នកទោសនយោបាយចំនួន៧២នាក់ត្រូវបានដោះលែង នេះបើយោងតាមក្រុមសិទ្ធិមនុស្ស Foro Penal។ លោកស្រី Rodriguez បានប្រាប់អ្នកសារព័ត៌មានថា «សារ នៅពីក្រោយការដោះលែង គឺប្រទេសវ៉េណេស៊ុយអេឡាដែលបើកចំហចំពោះពេលវេលានយោបាយថ្មី អនុញ្ញាតឱ្យមានការយល់ដឹងពីភាពខុសគ្នា និងពីភាពចម្រុះនៃមនោគមវិជ្ជានយោបាយ ប៉ុន្តែវាត្រូវតែគោរពចំពោះអ្នកដទៃ»។ ការដោះលែងអ្នកទោសនយោបាយនៅក្នុងប្រទេសអាមេរិកខាងត្បូងមួយនេះ គឺជាការទាមទារជាយូរមកហើយរបស់ក្រុមសិទ្ធិមនុស្ស ស្ថាប័នអន្តរជាតិ និងឥស្សរជនប្រឆាំង រួមទាំងអ្នកឈ្នះពានរង្វាន់ណូបែលសន្តិភាព លោកស្រី Maria Corina Machado ដែលមានសម្ព័ន្ធមិត្តជិតស្និទ្ធជាច្រើននាក់ជាប់ពន្ធនាគារ។ ជាមួយគ្នានេះ ក្រុមគ្រួសាររបស់អ្នកទោស បានចំណាយពេលយប់ទីប្រាំ បោះជំរំនៅខាងក្រៅពន្ធនាគារ El Rodeo របស់ប្រទេសវ៉េណេស៊ុយអេឡា ដោយដេកក្រោមពន្លឺភ្លើងទៀន និងមើលទូរស័ព្ទដៃសម្រាប់ព័ត៌មាន ខណៈពួកគេរង់ចាំមនុស្សជាទីស្រលាញ់ ដែលនឹងត្រូវបានដោះលែង។