ប្រធានាធិបតីអាមេរិក លោក Donald Trump បាននិយាយកាលពីថ្ងៃពុធ (១៤ មករា) ថា ការកាប់សម្លាប់នៅក្នុងការបង្ក្រាបរបស់អ៊ីរ៉ង់ លើបាតុកម្មទូទាំងប្រទេស កំពុងថយចុះហើយ ហើយលោកជឿថា ពុំមានផែនការសម្រាប់ការប្រហារជីវិតអ្នកតវ៉ាទ្រង់ទ្រាយធំទេ ប៉ុន្តែទោះជាបែបនេះក្ដី លោកមិនបានច្រានចោលលទ្ធភាពនៃអន្តរាគមន៍យោធារបស់សហរដ្ឋអាមេរិកឡើយ ខណៈក្រុមអ្នកវិភាគ និងអ្នកការទូតបានព្រមានអំពីហានិភ័យខ្ពស់ដែលអាចកើតមាន ចេញពីសកម្មភាពនេះ។

ការអត្ថាធិប្បាយរបស់លោក Trump បានកើតឡើង ខណៈមានការភ័យខ្លាចកាន់តែខ្លាំងឡើងនៅមជ្ឈិមបូព៌ាថា សហរដ្ឋអាមេរិក អាចនឹងបើកការវាយប្រហារលើអ៊ីរ៉ង់ បន្ទាប់ពីការគំរាមកំហែងម្តងហើយម្តងទៀតរបស់ប្រធានាធិបតីអាមេរិករូបនេះ ក្នុងការធ្វើអន្តរាគមន៍ជំនួសនាមឱ្យក្រុមបាតុករ។

ក្រុមអ្នកជំនាញ និងអ្នកការទូតក្នុងតំបន់មួយចំនួនព្រមានថា អន្តរាគមន៍យោធា អាចបង្កផលវិបាកត្រឡប់ទៅវិញ ដោយអាចជំរុញឱ្យការបង្ក្រាបកាន់តែខ្លាំងឡើងលើបាតុករ និងបង្កឱ្យមានការវាយប្រហារសងសឹកដោយមីស៊ីលពីអ៊ីរ៉ង់ លើមូលដ្ឋានទ័ពអាមេរិក នៅមជ្ឈិមបូព៌ា។ ប្រភពការទូតបាននិយាយថា រដ្ឋាភិបាលឈូងសមុទ្រអារ៉ាប់ «កំពុងភ័យខ្លាច» ចំពោះលទ្ធភាពនៃការវាយប្រហាររបស់អាមេរិក។

យ៉ាងណាក៏ដោយ នៅឯសេតវិមាន លោក Trump បានលើកឡើងថា លោកកំពុងប្រកាន់យកឥរិយាបថ «រង់ចាំមើលសិន» ចំពោះវិបត្តិនេះ។ លោក Trump ប្រាប់អ្នកយកព័ត៌មានថា លោកទទួលបានដំណឹងថា ការកាប់សម្លាប់ក្នុងការបង្ក្រាបរបស់របបអ៊ីរ៉ង់ លើការតវ៉ា កំពុងថយចុះហើយ ហើយលោកក៏ជឿជាក់ថា បច្ចុប្បន្ននេះ មិនមានផែនការសម្រាប់ការប្រហារជីវិតទ្រង់ទ្រាយធំទេ។ ប្រធានាធិបតីរូបនេះក៏មិនបានច្រានចោលលទ្ធភាពនៃសកម្មភាពយោធារបស់សហរដ្ឋអាមេរិកនោះដែរ ដោយនិយាយថា «អាមេរិកនឹងតាមដានដំណើរការនេះ»៕