សៀមរាប ៖ មន្ដ្រីជាន់ខ្ពស់ក្រសួងកសិកម្ម បានបញ្ជាក់ថា ទិសដៅគោលនយោបាយ រយៈពេល៥ឆ្នាំ គឺចាប់ឆ្នាំ២០១៤-២០១៨ នៃវិស័យកសិកម្ម បានជំរុញកំណើនផលិតកម្មកសិកម្មក្នុងរង្វង់៥% ហើយវិស័យកសិកម្ម បានចូលរួមចំណែក ប្រមាណជា ២៤,៩% នៃផលិតផលក្នុងស្រុកសរុប (GDP) ។
ឯកឧត្តម បានបន្ដទៀតថា ក្នុងនោះ ផ្នែកដំណាំបានចូលរួមចំនួន១៣% ផ្នែកផលិតកម្មសត្វចំនួន២,៦% ផ្នែកជលផលចំនួន៥,៥% និងផ្នែកព្រៃឈើចំនួន១,៦% ជាមោទនភាព កម្ពុជាបានប្រែក្លាយពីប្រទេស ដែលខ្វះខាតស្បៀងអាហារ ទៅជាប្រទេសដែលផលិតស្រូវលើសតម្រូវការប្រើប្រាស់ក្នុងស្រុក ។ ជាក់ស្តែង នៅឆ្នាំ២០១៧ អតិរេកស្រូវមានជាង៥,៥លានតោន គិតជាអង្ករស្មើ នឹងជាង៣,៥ លានតោនសម្រាប់បម្រើការនាំចេញ។ ក្រៅពីផ្នែកដំណាំ ផ្នែកផលិតកម្មសត្វក៏បាន និងកំពុង ដើរតួរយ៉ាងសំខាន់ នៅក្នុងការជំរុញកំណើនវិស័យកសិកម្ម និងការកាត់បន្ថយភាពក្រីក្រនៅជនបទ។
ឯកឧត្តម ទី សុគន្ធ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានបញ្ជាក់បែបនេះ ក្នុងសិក្ខាសាលាស្តីអំពីមូលដ្ឋានគ្រឹះកសិកម្ម និងវិទ្យាសាស្ត្រសត្វ រៀបចំឡើង នៅទីរួមខេត្តសៀមរាប ចាប់ពីថ្ងៃទី២៨ ដល់ ៣០ ខែសីហា ឆ្នាំ២០១៨ ម្សិលមិញនេះ ត្រូវបានបញ្ចប់ ។
សិក្ខាសាលានេះ ត្រូវបានគាំទ្រ និងរៀបចំឡើងក្រោមកិច្ចសហការរវាងក្រសួងកសិកម្មរុក្ខាប្រមាញ់ និងនេសាទ និងគំនិតផ្ដួចផ្ដើមស្តីអំពីកិច្ចសហប្រតិបត្តិការស្បៀង និងកសិកម្ម អាស៊ី ហៅកាត់ (អាហ្វាហ្សី-AFACI) នៃរដ្ឋបាលជនបទ នៃសាធារណៈរដ្ឋកូរ៉េ។
ឯកឧត្តម ទី សុគន្ធ បានបន្ថែមទៀតថា ការចូលរួមពីគម្រោងដៃគូអភិវឌ្ឍន៍គឺជាកម្លាំងចលករមួយជួយជំរុញឱ្យវិស័យកសិកម្មសម្រេចទៅបានតាមទិសដៅកំណត់។ អាហ្វាហ្សី នៃរដ្ឋបាលជនបទនៃសាធារណៈរដ្ឋកូរ៉េ បានសហការជាមួយក្រសួងកសិកម្ម រុក្ខាប្រមាញ់ និងនេសាទ តាំងពីឆ្នាំ២០០៩ ហើយបច្ចុប្បន្នកម្ពុជា កំពុងអនុវត្តគម្រោងចំនួន៧ ដែលគាំទ្រដោយ អាហ្វាហ្សី គឺគម្រោងបណ្តាញព័ត៌មានបច្ចេកទេសកសិកម្ម ធនធានហ្សេនេទិចសត្វ បច្ចេកទេសក្រោយប្រមូលផលដំណាំរួមផ្សំ ការអនុវត្តកសិកម្មល្អ ផលិតកម្មកសិកម្មសរីរាង្គ កសិកម្មចម្រុះគ្រប់គ្រងសមាសភាពចង្រៃ និងការផ្សព្វផ្សាយពូជដំណាំ ។
ឯកឧត្តម បានថ្លែងអំណរគុណ អាហ្វាហ្សី ដែលតែងតែគាំទ្រ និងបន្តពង្រឹងកិច្ចសហប្រតិបត្តិការ រវាងក្រសួងកសិកម្ម រុក្ខាប្រមាញ់ និងនេសាទ។
សម្រាប់ លោក បណ្ឌិត ហ្សឹង ហ្សូលី ប្រធានវិទ្យាស្ថានជាតិវិទ្យាសាស្ត្រសត្វនៃរដ្ឋបាលជនបទនៃសាធារណៈរដ្ឋកូរ៉េ មានប្រសាសន៍ថា អាហ្វាហ្សី ត្រូវបានបង្កើតឡើងនៅឆ្នាំ២០០៩ ក្នុងគោលបំណងកែលម្អ រផលិតកម្មស្បៀង ពង្រឹងផលិតកម្មកសិកម្មប្រកបដោយនិរន្តរភាព និងជំរុញការផ្លាស់ប្តូរបច្ចេកទេស និងព័ត៌មានរវាងប្រទេសជាសមាជិក ដែលប្រទេសកម្ពុជា គឺជាសមាជិកមួយក្នុងចំណោមសមាជិកដំបូងគេរបស់អាហ្វាហ្សី ។ លោក បណ្ឌិត ហ្សឹង ហ្សូលី បន្ដថា សិក្ខាសាលានាពេលនេះ ពិតជាផ្តល់ឱកាសដល់សមាជិកក្នុងការចែករំលែកលទ្ធផលការងារ និងពិភាក្សាលើផែនការងារសម្រាប់ឆ្នាំបន្ទាប់លើគម្រោងចំនួន២ គឺបច្ចេកទេសកសិកម្មសរីរាង្គ និងធនធានហ្សេនេទិចសត្វ។
គួរបញ្ជាក់ថា សិក្ខាសាលានេះ មានគោលបំណងដើម្បីពិនិត្យលើវឌ្ឍនភាពការងារ ចែករំលែកព័ត៌មាន និងចំណេះដឹង និងដើម្បីពង្រឹងភាពជាដៃគូរ និងកិច្ចសហប្រតិបត្តិការរវាងប្រទេសជាសមាជិកទាំង១៤ របស់ អាហ្វាហ្សី រួមមាន ៖ ប្រទេសកម្ពុជា សាធារណៈរដ្ឋកូរ៉េ គីហ្សីស បង់ក្លាដេស បូតាន ហ្វីលីពីន នេប៉ាល់ មីយ៉ានម៉ា ម៉ុងហ្គោលី ស្រីលង្កា ថៃ ឡាវ វៀតណាម និងឥណ្ឌូនេស៊ី៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
