យោងតាមទិន្នន័យ និងប្រភពដឹកជញ្ជូន បានឱ្យដឹងថា ក្នុងរយៈពេលប៉ុន្មានថ្ងៃថ្មីៗនេះ នាវាពាណិជ្ជកម្មរាប់សិបគ្រឿង បានបោះយុថ្កាចតនៅចម្ងាយដ៏ឆ្ងាយ ខាងក្រៅដែនកំណត់កំពង់ផែរបស់អ៊ីរ៉ង់ ខណៈដែលភាពតានតឹងជាមួយសហរដ្ឋអាមេរិក កំពុងឡើងកម្ដៅកាន់តែខ្លាំង។

ប្រភពដឹកជញ្ជូនបាននិយាយថា ជំហានបែបនេះគឺជា «ការប្រុងប្រយ័ត្នទុកជាមុន» ដោយសារភាពតានតឹងក្នុងពេលមានការតវ៉ាជាបន្តបន្ទាប់នៅអ៊ីរ៉ង់។ គួរឱ្យដឹងថា ដែនកំណត់កំពង់ផែមានសារៈសំខាន់ណាស់ ព្រោះទីតាំងនោះមានហានិភ័យខ្ពស់នៃការខូចខាតខ្លាំង ក្នុងករណីមានការវាយប្រហារតាមអាកាសលើហេដ្ឋារចនាសម្ព័ន្ធក្បែរនោះ។

កាលពីថ្ងៃពុធ (១៤ មករា) មន្ត្រីអាមេរិកមួយរូបបាននិយាយថា សហរដ្ឋអាមេរិក កំពុងដកបុគ្គលិករបស់ខ្លួនមួយចំនួនចេញពីមូលដ្ឋានទ័ពនៅមជ្ឈិមបូព៌ា បន្ទាប់ពីមន្ត្រីជាន់ខ្ពស់អ៊ីរ៉ង់ម្នាក់បាននិយាយថា ទីក្រុងតេអេរ៉ង់ បានព្រមានប្រទេសជិតខាងរបស់ខ្លួនថា ខ្លួននឹងវាយប្រហារមូលដ្ឋានទ័ពអាមេរិក ប្រសិនបើទីក្រុងវ៉ាស៊ីនតោន វាយប្រហារអ៊ីរ៉ង់។

ការវិភាគដោយក្រុមហ៊ុនផ្តល់ដំណោះស្រាយចារកម្មដែនសមុទ្រ Pole Star Global បានបង្ហាញថា ចំនួននាវាដឹកទំនិញ ដែលកំពុងធ្វើដំណើរចូលទៅក្នុងតំបន់សេដ្ឋកិច្ចផ្តាច់មុខរបស់អ៊ីរ៉ង់ (EEZ) បានហក់ឡើងពីនាវា ១គ្រឿង ទៅនាវា ៣៦គ្រឿង រវាងថ្ងៃទី៦ ខែមករា និងថ្ងៃទី១២ ខែមករា។ តំបន់សេដ្ឋកិច្ចផ្តាច់មុខរបស់អ៊ីរ៉ង់ (EEZ) នេះគឺជាផ្លូវទឹកតាមបណ្តោយឆ្នេរឈូងសមុទ្រ និងសមុទ្រកាសព្យែន លាតសន្ធឹងរហូតដល់ជិត ៣៩គីឡូម៉ែត្រ និងហួសពីដែនទឹកកំណត់ក្នុងស្រុក ២២ គីឡូម៉ែត្រណត់៕