រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយកាលពីថ្ងៃពុធ (១៤ មករា) ថា រុស្ស៊ី បើកចំហសម្រាប់កិច្ចចរចាសន្តិភាពលើបញ្ហាអ៊ុយក្រែន ប៉ុន្តែការពិភាក្សាអំពីបទឈប់បាញ់ មុនពេលមានកិច្ចព្រមព្រៀងសន្តិភាពពេញលេញ មិនមែនជារឿងម៉ឺងម៉ាត់នោះទេ។

លោក Lavrov បន្ថែមថា លោកប្រធានាធិបតីរុស្ស៊ី Vladimir Putin បានបញ្ជាក់ម្តងហើយម្តងទៀតថា លោកបើកចំហចំពោះតែកិច្ចពិភាក្សាដ៏ម៉ឺងម៉ាត់ប៉ុណ្ណោះអំពីសន្តិភាពនៅអ៊ុយក្រែន។

ការលើកឡើងនេះជាការឆ្លើយតបនឹងសំណួរអំពីរបាយការណ៍សារព័ត៌មាន ដែលថា អ្នកតំណាងសេតវិមាន គឺលោក Steve Witkoff និងកូនប្រសាររបស់ប្រធានាធិបតីអាមេរិក Donald Trump គឺលោក Jared Kushner កំពុងធ្វើដំណើរទៅទីក្រុងមូស្គូ ដើម្បីជួបលោក Putin។ លោក Lavrov បន្តថា៖ នោះនឹងមានប្រយោជន៍ខ្លាំងណាស់ ប្រសិនបើទីក្រុងវ៉ាស៊ីនតោន រាយការណ៍ជូនទីក្រុងមូស្គូ អំពីសំណើសន្តិភាពចុងក្រោយបំផុតសម្រាប់អ៊ុយក្រែន។

មេដឹកនាំអឺរ៉ុប បានគាំទ្រឱ្យមានបទឈប់បាញ់មួយនៅអ៊ុយក្រែន តាមបណ្តោយជួរមុខបច្ចុប្បន្ន ដោយពួកគេចាត់ទុកជំហាននេះថាជាចំណុចចាប់ផ្តើមសម្រាប់ការចរចាបន្ថែមទៀត។

រហូតមកដល់ពេលនេះ រុស្ស៊ីបានបដិសេធការអំពាវនាវឱ្យមានបទឈប់បាញ់ជាបន្ទាន់ និងបង្កើនការវាយប្រហារតាមអាកាសលើអ៊ុយក្រែន។ កាលពីខែតុលា ឆ្នាំ២០២៥ លោក Lavrov បាននិយាយថា ទីក្រុងមូស្គូ នឹងមិនបញ្ចប់អរិភាពទេ បើពុំមាន «កិច្ចព្រមព្រៀងសន្តិភាពដ៏ទូលំទូលាយ» មួយ ដោយអះអាងថា ការបញ្ឈប់សង្គ្រាមឥឡូវនេះ នឹងមានន័យថា ជាការ «បំភ្លេចមូលហេតុឬសគល់នៃជម្លោះ»៕