បណ្តាប្រទេសនៅអឺរ៉ុប រួមមានអ៊ីតាលី ប៉ូឡូញ អាល្លឺម៉ង់ និងអេស្ប៉ាញ កាលពីថ្ងៃពុធ (១៤ មករា) បានអំពាវនាវឱ្យពលរដ្ឋរបស់ពួកគេចាកចេញពីប្រទេសអ៊ីរ៉ង់ ដោយសារក្តីបារម្ភអំពីសន្តិសុខ ស្របពេលមានការតវ៉ាប្រឆាំងរដ្ឋាភិបាលដែលកំពុងបន្តកើតមាននៅទីនោះ និងរបាយការណ៍ស្ដីពីលទ្ធភាពនៃអន្តរាគមន៍យោធារបស់សហរដ្ឋអាមេរិក។

របាយការណ៍បាននិយាយថា បុគ្គលិករបស់អាមេរិក និងអង់គ្លេសមួយចំនួន ត្រូវបានជម្លៀសចេញពីទីតាំងនានានៅមជ្ឈិមបូព៌ា ដើម្បីជាការប្រុងប្រយ័ត្នទុកជាមុន ហើយស្ថានទូតអង់គ្លេសប្រចាំទីក្រុងតេអេរ៉ង់ ក៏ត្រូវបានបិទជាបណ្ដោះអាសន្នផងដែរ។ ភាពបន្ទាន់ទាំងនេះ បានកើតឡើងបន្ទាប់ពីការអំពាវនាវរបស់សហរដ្ឋអាមេរិក នៅដើមសប្ដាហ៍នេះ ឱ្យពលរដ្ឋរបស់ខ្លួនចាកចេញពីអ៊ីរ៉ង់ជាបន្ទាន់។

អ៊ីរ៉ង់ រងភាពរង្គោះរង្គើដោយការតវ៉ាធំៗជាច្រើន ដោយចាប់ផ្តើមនៅថ្ងៃទី២៨ ខែធ្នូ ឆ្នាំ២០២៥ នៅឯផ្សារមួយកន្លែងក្នុងទីក្រុងតេអេរ៉ង់ ជុំវិញការធ្លាក់ចុះយ៉ាងខ្លាំងនៃរូបិយបណ្ណអ៊ីរ៉ង់ និងស្ថានភាពសេដ្ឋកិច្ចកាន់តែអាក្រក់ទៅៗ។ ក្រោយមក ការតវ៉ាបានរីករាលដាលដល់ទីក្រុងជាច្រើនទៀត និងបានក្លាយជាការទាមទារឱ្យបញ្ចប់របបដឹកនាំ។

យោងតាមការជូនដំណឹងអាកាសចរណ៍នៅថ្ងៃព្រហស្បតិ៍នេះ បានឱ្យដឹងថា អ៊ីរ៉ង់បិទដែនអាកាសរបស់ខ្លួនជាបណ្តោះអាសន្នចំពោះជើងហោះហើរភាគច្រើន ស្របពេលការភ័យខ្លាចចំពោះការវាយប្រហារ។ ក្រោយមកដែនអាកាសក៏បានបើកឡើងវិញ ដោយគេហទំព័រតាមដានជើងហោះហើរ Flightradar24 បង្ហាញថា ជើងហោះហើរជាច្រើនកំពុងឆ្លងកាត់ដែនអាកាសរបស់ប្រទេសនេះជាធម្មតាវិញ៕