មន្ត្រី និងអ្នកស្រុក បានប្រាប់ឲ្យដឹងកាលពីថ្ងៃពុធ (ទី១៤ ខែមករា ឆ្នាំ២០២៦) ថា មនុស្សរាប់ពាន់នាក់បានរត់គេចចេញពីផ្ទះសម្បែងរបស់ពួកគេ នៅភាគពាយព្យនៃប្រទេសនីហ្សេរីយ៉ា ក្នុងសប្តាហ៍នេះ បន្ទាប់ពីមេក្រុមចោរប្រដាប់អាវុធមួយក្រុម នៅក្នុងតំបន់នេះ បានបញ្ជាឲ្យពួកគេចាកចេញ ជាការសងសឹក ចំពោះការវាយឆ្មក់របស់កងកម្លាំងសន្តិសុខ។

មន្ត្រីនិយាយថា លោក Bello Turji គឺជាអ្នកដឹកនាំក្រុមចោរប្រដាប់អាវុធមួយ ក្នុងចំណោមក្រុមអន្ធពាលប្រដាប់អាវុធជាច្រើន ដែលបង្កភេរវកម្មនៅភាគពាយព្យនីហ្សេរីយ៉ា ជាទីដែលមានជនមូស្លីមភាគច្រើន ដោយបានសម្លាប់ និងចាប់ពង្រត់អ្នកស្រុក កសិករ និស្សិត និងអ្នកបើកបរ ដើម្បីទារយកប្រាក់។

អំពើហិង្សានៅក្នុងប្រទេសដែលមានប្រជាជនច្រើនបំផុតជាងគេ នៅទ្វីបអាហ្វ្រិកនេះ បានទាក់ទាញឲ្យមានការចាប់អារម្មណ៍ពីសំណាក់ប្រធានាធិបតីអាមេរិក លោក Donald Trump ដែលបានចោទប្រកាន់រដ្ឋាភិបាលថា បានបរាជ័យក្នុងការទប់ស្កាត់ការសម្លាប់គ្រិស្តបរិស័ទ។ តែនីហ្សេរីយ៉ាបញ្ជាក់ថា ក្រុមអន្ធពាល និងពួកសកម្មប្រយុទ្ធ កំណត់គោលដៅ ទាំងលើគ្រិស្តបរិស័ទ និងមូស្លីម ហើយគ្រិស្តបរិស័ទ មិនត្រូវបានគេធ្វើទុក្ខបុកម្នេញជាប្រព័ន្ធនោះទេ។

អ្នកស្រុកនៃសហគមន៍ Tidibale ភាគពាយព្យ ប្រាប់ថា លោក Turji សង្ស័យថា ការផ្តល់ព័ត៌មានពីសហគមន៍ដល់កងកម្លាំងសន្តិសុខ បាននាំឲ្យមានប្រតិបត្តិការយោធាថ្មីៗនេះ ដែលបានសម្លាប់សមាជិកក្រុមម្នាក់។

លោក Turji បានទៅសហគមន៍ Tidibale កាលពី ៣ថ្ងៃមុន ហើយបានសម្លាប់មនុស្ស ៣នាក់ ដើម្បីអនុវត្តការបញ្ជារបស់ខ្លួនឲ្យមនុស្សក្នុងសហគមន៍នេះចាកចេញ។ នេះបើយោងតាមលោក Basharu Altine Guyawa អ្នកសម្របសម្រួលនៃចលនា ដើម្បីយុត្តិធម៌សង្គម និងអភិបាលកិច្ចល្អ ក្នុងរដ្ឋ Sokoto៕