នៅថ្ងៃព្រហស្បតិ៍នេះ ជប៉ុន និងហ្វីលីពីន បានចុះហត្ថលេខាលើកិច្ចព្រមព្រៀងការពារជាតិចំនួន ២ រួមទាំងកិច្ចព្រមព្រៀងអនុញ្ញាតឲ្យកងកម្លាំងរបស់ពួកគេផ្លាស់ប្តូរសម្ភារៈ និងសេវាកម្ម ស្របពេលដែលប្រទេសទាំង ២ ព្យាយាមពង្រឹងកិច្ចសហប្រតិបត្តិការសន្តិសុខ ជាការឆ្លើយតបនឹងភាពតានតឹងក្នុងតំបន់កើនឡើង ។

កិច្ចព្រមព្រៀង Acquisition and Cross-Servicing Agreement ដែលនឹងអនុញ្ញាតឲ្យមានការផ្តល់ស្បៀងអាហារ ប្រេងឥន្ធនៈ សម្ភារៈចាំបាច់ផ្សេងទៀតនៅពេលកងកម្លាំងជប៉ុនធ្វើទស្សនកិច្ចនៅហ្វីលីពីន ហើយនិងផ្តោតសំខាន់លើសុវត្ថិភាពនៃការចែករំលែកព័ត៌មានការពារជាតិដោយសម្ងាត់ និងព័ត៌មានយោធារវាងភាគីទាំង ២នោះ បានកើតមានឡើងរយៈពេលជាច្រើនខែ បន្ទាប់ពីកិច្ចព្រមព្រៀងសំខាន់ Reciprocal Access Agreement រវាងប្រទេសសម្ព័ន្ធមិត្តអាស៊ីជិតស្និតបំផុតរបស់សហរដ្ឋអាមេរិកទាំង ២ ចូលជាធរមាន ។

រដ្ឋមន្រ្តីការបរទេសជប៉ុនលោក Toshimitsu Motegi បានចុះហត្ថលេខាលើកិច្ចព្រមព្រៀងនេះ អំឡុងដំណើរទស្សនកិច្ចនៅតំបន់មជ្ឈិមបូព៌ា និងអាស៊ីរយៈពេល ៩ថ្ងៃ ជាមួយនឹងការឈប់សំចតនៅអ៊ីស្រាអែល ដែនដីប៉ាឡេស្ទីន កាតា និងឥណ្ឌា ។

លោក Motegi និងសមភាគីហ្វីលីពីនលោកស្រី Theresa Lazaro បានប្រកាសផងដែរជំនួយសន្តិសុខផ្លូវការ ៦លានដុល្លារពីទីក្រុងតូក្យូ ដើម្បីសាងសង់ឃ្លាំងរក្សាទុកទូកពោងដែលបរិច្ចាគដោយជប៉ុន ដើម្បីពង្រឹងសមត្ថភាពកងទ័ពជើងទឹកហ្វីលីពីន ។

ដំណើរទស្សនកិច្ចរបស់លោក Motegi កើតមានផងដែរ ពេលដែលហ្វីលីពីនទទួលយកវេនធ្វើជាប្រធានអាស៊ាន ស្របពេលភាពតានតឹងកើនឡើងនៅច្រកសមុទ្រតៃវ៉ាន់ ៕