យានអាវកាសរបស់ក្រុមហ៊ុន SpaceX ដឹកអវកាសយានិក ៤រូបពីស្ថានីយអវកាសអន្តរជាតិ(ISS) បានចុះចតនៅតំបន់ឆ្នេរដ្ឋ California ក្រោយបញ្ចប់បេសកកម្មរបស់ពួកគេមុនកាលកំណត់ ដោយសារគ្រាអាសន្នវេជ្ជសាស្រ្ត ។

យានអវកាស SpaceX Dragon ដែលគេស្គាល់ថាជាយានអវកាស “Endeavour” បានចាប់ផ្តើមដំណើរចុះចតរយៈពេល ១០ម៉ោងកន្លះរបស់ពួកគេចេញពីគន្លងតារាវិថី កាលពីវេលាម៉ោង ២២ និង ៣០នាទី ម៉ោងសកល ថ្ងៃពុធ ហើយនិងបានចុះចតនៅថ្ងៃព្រហស្បតិ៍នេះ នៅក្នុងមហាសមុទ្រប៉ាស៊ីហ្វិក ។ នេះបើយោងតាមការអះអាងរបស់ទីភ្នាក់ងារអវកាសណាសារបស់សហរដ្ឋអាមេរិក ។

នៅលើយានអវកាស Endeavour មានអវកាសយានិក Zena Cardman និង Mike Fincke, របស់អង្គការណាសា អវកាសយានិកជប៉ុន Kimiya Yui និងអវកាសយានិករុស្ស៊ី Oleg Platonov ។

ក្រុមអវកាសយានិកមួយនេះ បានចំណាយពេល ១៦៧ថ្ងៃនៅលើយានក្នុងស្ថានីយអវកាស ដើម្បីចុះបេសកកម្មវិទ្យាសាស្រ្តរយៈពេលយូរ ដែលជាផ្នែកមួយនៃបេសកកម្មមានមនុស្សលើកទី ១១របស់ក្រុមហ៊ុន SpaceX ។ ពួកគេគឺជាផ្នែកមួយផងដែរនៃបេសកកម្ម Expedition 74 របស់អង្គការណាសា ដែលបានចាប់ផ្តើមកាលពីថ្ងៃទី ៨ ខែធ្នូ ឆ្នាំ ២០២៥កន្លងទៅ ។

អង្គការណាសា បានប្រកាសកាលពីថ្ងៃទី ៨ ខែមករាថា បេសកកម្ម SpaceX-Crew 11នឹងត្រូវបញ្ចប់មុនផែនការគ្រោងទុក ដោយសារស្ថានភាពសុខភាពធ្ងន់ធ្ងររបស់អវកាសយានិកម្នាក់ ។ បេសកកម្មមួយនេះ ដំបូងឡើយគ្រោងនឹងបញ្ចប់ទៅ នៅចុងខែកុម្ភៈខាងមុខ ៕