ប្រជាជនអ៊ូហ្គង់ដា បានចេញប្រើសិទ្ធិរបស់ខ្លួន នៅក្នុងការបោះឆ្នោតជាតិដ៏តានតឹងមួយ នាថ្ងៃព្រហស្បតិ៍ (ទី១៥ ខែមករា ឆ្នាំ២០២៦) នេះ បន្ទាប់ពីបិទបញ្ចប់យុទ្ធនាការឃោសនា ដែលជាញឹកញាប់មាននូវអំពើហិង្សា និងការបិទប្រព័ន្ធអ៊ីនធឺណិត ដោយលោកប្រធានាធិបតី Yoweri Museveni កំពុងស្វែងរកការបន្តការគ្រប់គ្រងរបស់លោករហូត ៥ទសវត្សរ៍។

លោក Museveni ត្រូវបានគេរំពឹងថា នឹងទប់ទល់ជាមួយការប្រកួតប្រជែងពីតារាចម្រៀងដ៏ពេញនិយម គឺលោក Bobi Wine ប៉ុន្តែការបោះឆ្នោតនេះ គឺជាការសាកល្បងឥទ្ធិពល និងសមត្ថភាពនយោបាយរបស់មេដឹកនាំវ័យ ៨១ឆ្នាំរូបនេះ ក្នុងការបញ្ចៀសប្រភេទភាពចលាចលដែលបានធ្វើឲ្យរង្គោះរង្គើប្រទេសជិតខាង គឺតង់ហ្សានី និងកេនយ៉ា។

មេដឹកនាំដ៏យូរអង្វែង ដែលបានឡើងកាន់អំណាចអំឡុងការបះបោរក្នុងឆ្នាំ១៩៨៦ បានធ្វើយុទ្ធនាការជាមួយនឹងពាក្យថា «ការពារផលប្រយោជន៍» ដោយសន្យាថា នឹងរក្សាសន្តិភាព និងលើកប្រទេសឲ្យមានឋានៈជាប្រទេសមានចំណូលមធ្យម ទោះបីជានៅទីបំផុត មានការរំពឹងទុកពីការស្នងតំណែងរបស់លោកក៏ដោយ។

ចំណែកលោក Wine ជាតារាចម្រៀងប៉ុបអាយុ ៤៣ឆ្នាំដែលត្រូវបានដាក់រហស្សនាមថា «ប្រធានាធិបតី Ghetto» ដោយសារការមានកំណើតក្នុងស្ថានភាពក្រីក្ររបស់លោក បានប្រឹងប្រែងបញ្ចុះបញ្ចូលយុវជនដែលខឹងសម្បា ចំពោះការមិនទទួលបានឱកាសសេដ្ឋកិច្ច នៅក្នុងប្រទេស ដែលមានអាយុជាមធ្យមលើសពី ១៦ឆ្នាំ។

ការបោះឆ្នោតបានចាប់ផ្តើមនៅរដ្ឋធានី Kampala ដោយមានវត្តមាននគរបាលយ៉ាងច្រើន។ តែបើយោងតាមការផ្សាយរបស់ទូរទស្សន៍ NTV Uganda បានឲ្យដឹងថា ការិយាល័យបោះឆ្នោតជាច្រើននៅទូទាំងប្រទេស នៅតែមិនទាន់បើក ប៉ុន្មានម៉ោងក្រោយពេលវេលាចាប់ផ្តើមផ្លូវការ នៅម៉ោង ៧ព្រឹក ម៉ោងក្នុងស្រុក (ត្រូវនឹងម៉ោង ៤រសៀល ម៉ោងសកល) ដោយសារតែម៉ាស៊ីនផ្ទៀងផ្ទាត់ជីវមាត្រអ្នកបោះឆ្នោតមិនដំណើរការ។

គួរបញ្ជាក់ថា ក្រៅពីលោក Wine បេក្ខជនប្រឆាំងចំនួន ៦រូបផ្សេងទៀត កំពុងប្រកួតប្រជែងជាមួយលោក Museveni ដែលជាប្រមុខរដ្ឋកាន់អំណាចយូរជាងគេទី៣ របស់ទ្វីបអាហ្វ្រិក។ ហើយអ្នកបោះឆ្នោតក៏នឹងជ្រើសរើសសមាជិកសភាជាង ៥០០នាក់ផងដែរ។ ដំណើរការបោះឆ្នោតនេះ គ្រោងបិទនៅម៉ោង ៤:០០រសៀល ម៉ោងក្នុងស្រុក ដោយលទ្ធផលត្រូវបានគេរំពឹងថា នឹងត្រូវប្រកាសក្នុងរង្វង់រយៈពេល ៤៨ម៉ោង៕