ប្រធានាធិបតីអាមេរិក លោក Donald Trump បាននិយាយថា លោកត្រូវបានគេរាយការណ៍ប្រាប់ថា ការសម្លាប់ អំឡុងការបង្ក្រាបលើការតវ៉ា នៅអ៊ីរ៉ង់ កំពុងធូរស្រាល ហើយបានបញ្ជាក់ថា លោកជឿថា នាពេលនេះ មិនមានផែនការប្រហារជីវិតទ្រង់ទ្រាយធំនោះទេ ដោយប្រកាន់យកឥរិយាបថរង់ចាំមើល បន្ទាប់ពីមានការគំរាមកំហែងអន្តរាគមន៍នៅមុននេះ។

បន្ទាប់ពីរដ្ឋមន្ត្រីការបរទេសអ៊ីរ៉ង់ បានប្រាប់ថា អ៊ីរ៉ង់ «មិនមានផែនការ» ព្យួរកប្រជាជននោះទេ ប្រព័ន្ធផ្សព្វផ្សាយរដ្ឋអ៊ីរ៉ង់ នៅថ្ងៃព្រហស្បតិ៍ (ទី១៥ ខែមករា ឆ្នាំ២០២៦)នេះ បានរាយការណ៍ថា បុរសអាយុ ២៦ឆ្នាំម្នាក់ដែលត្រូវបានចាប់ខ្លួន ក្នុងអំឡុងពេលតវ៉ា នៅក្នុងទីក្រុង Karaj នឹងមិនត្រូវបានកាត់ទោសប្រហារជីវិតឡើយ។

នៅដើមសប្តាហ៍នេះ អង្គការសិទ្ធិមនុស្ស Hengaw បានរាយការណ៍ថា បុរសឈ្មោះ Essam Soltani អាយុ ២៦ឆ្នាំ ដែលត្រូវបានចាប់ខ្លួនទាក់ទងនឹងការតវ៉ា នៅក្នុងទីក្រុង Karaj នឹងត្រូវប្រហារជីវិតនៅថ្ងៃពុធ។ តែប្រព័ន្ធផ្សព្វផ្សាយរដ្ឋអ៊ីរ៉ង់ បានឲ្យដឹងថា បើទោះបីជាលោក Soltani ត្រូវបានចោទប្រកាន់ពីបទឃុបឃិតប្រឆាំងនឹង «សកម្មភាពសន្តិសុខផ្ទៃក្នុង និងឃោសនាប្រឆាំងនឹងរបប» ក៏ដោយ ក៏ទោសប្រហារជីវិតមិនត្រូវបានអនុវត្ត ចំពោះការចោទប្រកាន់បែបនេះនោះទេ ប្រសិនបើបទចោទទាំងនោះត្រូវបានប្រកាសដោយតុលាការ។ ហើយអង្គការ Hengaw ដោយដកស្រង់សម្តីសាច់ញាតិរបស់ជនជាប់ចោទ បានឲ្យដឹងថា បទបញ្ជាពីមុន ដើម្បីប្រហារជីវិតរូបគេ ត្រូវបានពន្យារពេល។

លោក Trump បានគំរាមកំហែងម្តងហើយម្តងទៀតថា នឹងធ្វើអន្តរាគមន៍ តំណាងឲ្យក្រុមបាតុករ នៅអ៊ីរ៉ង់ ជាទីដែលការគ្រប់គ្រងរបស់មេដឹកនាំសាសនា បានបង្ក្រាបយ៉ាងខ្លាំងក្លាលើភាពចលាចលទូទាំងប្រទេស ចាប់តាំងពីថ្ងៃទី២៨ ខែធ្នូឆ្នាំមុន។ យ៉ាងណាក្ដី ប្រជាជននៅក្នុងប្រទេស ដែលសារព័ត៌មាន Reuters បានទាក់ទងកាលពីថ្ងៃពុធ និងថ្ងៃព្រហស្បតិ៍ បានប្រាប់ឲ្យដឹងថា ការតវ៉ាហាក់ដូចជាបានថយចុះ ចាប់តាំងពីថ្ងៃចន្ទ។ លំហូរព័ត៌មានត្រូវបានរារាំងដោយការដាច់ប្រព័ន្ធអ៊ីនធឺណិតរយៈពេលមួយសប្តាហ៍៕