ដោយដកស្រង់សម្តីពីមន្ត្រីអាមេរិក សារព័ត៌មាន New York Times (NYT) នាថ្ងៃព្រហស្បតិ៍ (ទី១៥ ខែមករា ឆ្នាំ២០២៦) នេះ បានរាយការណ៍ថា សហរដ្ឋអាមេរិកកំពុងបង្កើនសម្ពាធលើប្រទេសម៉ិកស៊ិក ដើម្បីអាចឲ្យកងកម្លាំងយោធាអាមេរិកធ្វើប្រតិបត្តិការរួមគ្នា ក្នុងគោលបំណងកម្ទេចមន្ទីរពិសោធន៍សារធាតុហ្វង់តានីល នៅក្នុងប្រទេសនេះ។

មន្ត្រីអាមេរិកចង់ឲ្យកងកម្លាំងអាមេរិក ទាំងកងទ័ពប្រតិបត្តិការពិសេស ឬមន្ត្រីរបស់ CIA (ទីភ្នាក់ងារស៊ើបការណ៍សម្ងាត់កណ្តាល) អមដំណើរទាហានម៉ិកស៊ិក ក្នុងប្រតិបត្តិការវាយឆ្មក់លើកន្លែងសង្ស័យជាមន្ទីរពិសោធន៍សារធាតុហ្វង់តានីល។ នេះបើយោងតាមរបាយការណ៍ដែលបានដកស្រង់សម្តីមន្ត្រីជាច្រើន ដែលបាននិយាយក្នុងលក្ខខណ្ឌមិនបញ្ចេញឈ្មោះ។

គួរបញ្ជាក់ថា ប្រធានាធិបតីអាមេរិក លោក Donald Trump បានប្រាប់ប្រព័ន្ធផ្សព្វផ្សាយ Fox News កាលពីសប្តាហ៍មុនថា ក្រុមជួញដូរគ្រឿងញៀន កំពុងគ្រប់គ្រងម៉ិកស៊ិក ហើយបានណែនាំថា សហរដ្ឋអាមេរិក អាចវាយប្រហារគោលដៅផ្លូវគោក ដើម្បីប្រយុទ្ធប្រឆាំងនឹងពួកគេ ដែលជាការគំរាមកំហែងមួយ ក្នុងការដាក់ពង្រាយកម្លាំងយោធាអាមេរិកជាបន្តបន្ទាប់ ប្រឆាំងនឹងក្រុមជួញដូរគ្រឿងញៀន។

ប្រធានាធិបតីម៉ិកស៊ិក លោកស្រី Claudia Sheinbaum បាននិយាយនៅសប្តាហ៍នេះថា លោកស្រីបានបដិសេធអន្តរាគមន៍យោធារបស់សហរដ្ឋអាមេរិក ក្នុងការប្រយុទ្ធប្រឆាំងនឹងក្រុមជួញដូរគ្រឿងញៀន បន្ទាប់ពីមាន «ការសន្ទនាដ៏ល្អ» ជាមួយលោក Trump ស្តីពីសន្តិសុខ និងការជួញដូរគ្រឿងញៀន។

របាយការណ៍របស់សារព័ត៌មាន NYT បានឲ្យដឹងថា សំណើរបស់សហរដ្ឋអាមេរិកទៅកាន់ម៉ិកស៊ិក ដើម្បីឲ្យប្រើប្រាស់កងកម្លាំងអាមេរិក ត្រូវបានចាប់ផ្ដើមឡើងវិញ បន្ទាប់ពីកងកម្លាំងរបស់ទីក្រុងវ៉ាស៊ីនតោន បានចាប់ខ្លួនប្រធានាធិបតីវេណេស៊ុយអេឡា លោក Nicolas Maduro អំឡុងការវាយឆ្មក់មួយ កាលពីថ្ងៃទី៣ ខែមករា៕