នាយករដ្ឋមន្រ្តីប៉ូឡូញលោក Donald Tusk និយាយនៅថ្ងៃព្រហស្បតិ៍នេះថា ប្រទេសរបស់លោកនឹងមិនបញ្ជូនទាហានទៅកាន់កោះ Greenland នោះទេ ហើយលោកបន្តថា ការវាយប្រហារណាមួយដោយប្រទេសសមាជិកអង្គការណាតូ លើទឹកដីប្រទេសមួយទៀតដែលជាសមាជិករបស់ខ្លួន នឹងបញ្ចប់ពិភពលោកដូចដែលពួកយើងបានដឹងរួចហើយ ។

 លោក Tusk និយាយនៅក្នុងសន្និសីទសារព័ត៌មានថា ការប៉ុនប៉ងណាមួយក្នុងការដណ្តើមយកផ្នែកណាមួយរបស់រដ្ឋសមាជិកអង្គការណាតូ ដោយរដ្ឋសមាជិករបស់អង្គការណាតូមួយទៀត នឹងក្លាយជាគ្រោះមហន្តរាយនយោបាយ ។

 ប្រធានាធិបតីសហរដ្ឋអាមេរិក លោក Donald Trump បានបញ្ជាក់ជាថ្មីកាលពីថ្ងៃពុធថា សហរដ្ឋអាមេរិក ត្រូវការកោះ Greenland ខ្លាំងណាស់ ហើយថា ប្រទេសដាណឺម៉ាក មិនអាចពឹងផ្អែកបានទេក្នុងការការពារកោះនេះ ។

 ការលើកឡើងបែបនេះ បានកើតឡើង បន្ទាប់ពីកិច្ចប្រជុំដ៏សំខាន់មួយរវាងក្រុមមន្ត្រីអាមេរិក ដាណឺម៉ាក និង Greenland ហើយបានបង្ហាញឲ្យឃើញថា ការខ្វែងគំនិតគ្នាជាមូលដ្ឋាននៅតែមានរវាងទីក្រុងវ៉ាស៊ីនតោន ទីក្រុងកូប៉ិនហាក និងទីក្រុងនូក ទៅលើចក្ខុវិស័យអនាគតនយោបាយរបស់កោះនេះ ។

Trump បានប្រាប់អ្នកសារព័ត៌មានថា កោះ Greenland មានសារៈសំខាន់ខ្លាំងណាស់សម្រាប់សន្តិសុខជាតិអាមេរិក រួមទាំងសម្រាប់សន្តិសុខដាណឺម៉ាកផងដែរ ។ 

លោកបន្តថា បញ្ហានៅត្រង់ថា គ្មានអ្វីដែលដាណឺម៉ាកអាចធ្វើបានចំពោះដែនដីនេះទេ ប្រសិនបើរុស្ស៊ី ឬចិន ចង់កាន់កាប់កោះ Greenland ប៉ុន្តែអាមេរិក អាចធ្វើបានគ្រប់យ៉ាង ដូចដែលបានឃើញរឿងនោះកាលពីសប្តាហ៍មុនជាមួយវ៉េណេស៊ុយអេឡារួចហើយ ។

នៅថ្ងៃព្រហស្បតិ៍នេះដែរ យោធាមកពីបារាំង និងអាល្លឺម៉ង់ បានធ្វើដំណើរទៅកាន់កោះ Greenland ស្របពេលដែលដាណឺម៉ាក និងប្រទេសសម្ព័ន្ធរបស់ពួកគេ ត្រៀមខ្លួនធ្វើសមយុទ្ធយោធា ៕