យោងតាមការសែតប្រចាំថ្ងៃ Dawnរបស់ប្រទេសប៉ាគីស្ថាន បេសកជនអ៊ីរ៉ង់មួយរូប បាននិយាយកាលពីថ្ងៃព្រហស្បតិ៍១៥មករាសប្ដាហ៍នេះថា ប្រធានាធិបតីអាមេរិក លោក Donald Trumpបានជូនដំណឹងដល់អ៊ីរ៉ង់ថាលោកនឹងមិនវាយប្រហារប្រទេសនេះទេប៉ុន្តែបានអំពាវនាវឱ្យមានការអត់ធ្មត់។ 

កាសែតដដែល បានរាយការណ៍ថា ឯកអគ្គរដ្ឋទូតអ៊ីរ៉ង់ប្រចាំទីក្រុងអ៊ីស្លាម៉ាបាដ លោក Reza Amiri Moghadam បាននិយាយថា លោកបានទទួលព័ត៌មាននៅម៉ោងប្រហែល ១ ព្រឹក ដែលបង្ហាញថា លោក Trump មិនចង់បានសង្គ្រាមទេ ហើយបានស្នើឱ្យអ៊ីរ៉ង់កុំវាយប្រហារផលប្រយោជន៍របស់អាមេរិកក្នុងតំបន់ ។ 

មានការរំពឹងទុកខ្ពស់ចាប់តាំងពីថ្ងៃពុធថា រដ្ឋបាលលោក Trump អាចបើកការវាយប្រហារលើអ៊ីរ៉ង់ បន្ទាប់ពីរបាយការណ៍និយាយថា អាមេរិកបានចាប់ផ្តើមដកបុគ្គលិកចេញពីមូលដ្ឋានយោធារបស់ខ្លួននៅមជ្ឈិមបូព៌ា ហើយទីក្រុងវ៉ាស៊ីនតោន ណែនាំពលរដ្ឋអាមេរិកកាលពីថ្ងៃចន្ទឱ្យចាកចេញពីអ៊ីរ៉ង់ដោយមិនបង្អង់យូរ។

លោក Trump បានគំរាមដាក់ទណ្ឌកម្មទីក្រុងតេអេរ៉ង់ ស្របពេលរបាយការណ៍អំពីអ្នកស្លាប់ និងរបួសនៅអ៊ីរ៉ង់ក្នុងអំឡុងពេលតវ៉ាប្រឆាំងរដ្ឋាភិបាល។ ទោះយ៉ាងណាក៏ដោយ ប្រធានាធិបតីអាមេរិកបានបន្ទន់វោហារសាស្ត្ររបស់លោកចំពោះអ៊ីរ៉ង់ក្នុងអំឡុងការអត្ថាធិប្បាយនៅសេតវិមានកាលពីល្ងាចថ្ងៃពុធ។លោក Trump និយាយថា លោកត្រូវបានគេជូនដំណឹងថា ការប្រហារជីវិតនៅអ៊ីរ៉ង់បានឈប់ហើយ ប៉ុន្តែបានព្រមានថាប្រសិនបើមានរឿងបែបនេះកើតឡើង ពួកលោកទាំងអស់គ្នានឹងមានការសោកសៅ។ 

មន្ត្រីរដ្ឋាភិបាលអ៊ីរ៉ង់បានចោទប្រកាន់អាមេរិក និងអ៊ីស្រាអែលថាគាំទ្រអ្វីដែលពួកគេហៅថាជា "កុបកម្ម" និង "ភេរវកម្ម" ក្នុងអំឡុងពេលការតវ៉ាកំពុងបន្ត។

ខណៈក្រុមអាជ្ញាធរអ៊ីរ៉ង់ពុំទាន់បានចេញផ្សាយតួលេខផ្លូវការស្តីពីអ្នកស្លាប់ និងរបួស ឬអ្នកជាប់ឃុំ ទីភ្នាក់ងារសារព័ត៌មានសកម្មជនសិទ្ធិមនុស្ស (HRANA) មានមូលដ្ឋាននៅអាមេរិកបានប៉ាន់ប្រមាណថាមនុស្សជាង ២.៦០០ នាក់ត្រូវបានសម្លាប់ រួមទាំងក្រុមបាតុករ និងបុគ្គលិកសន្តិសុខផងដែរ៕