ប្រធានាធិបតីអាមេរិក លោក Donald Trump បានចេញការគំរាមដ៏ខ្លាំងក្លាមួយកាលពីថ្ងៃព្រហស្បតិ៍ (១៥ មករា) ថា លោកនឹងប្រើប្រាស់ច្បាប់ស្តីពីការបះបោរ (Insurrection Act) ដើម្បីដាក់ពង្រាយកងកម្លាំងយោធា នៅរដ្ឋ Minnesota របស់សហរដ្ឋអាមេរិក បន្ទាប់ពីការតវ៉ាយ៉ាងក្តៅគគុកអស់ជាច្រើនថ្ងៃមកហើយ ជុំវិញកំណើនវត្តមាននៃភ្នាក់ងារអន្តោប្រវេសន៍ នៅតាមដងផ្លូវនៃទីក្រុង Minneapolis។

ការប្រឈមមុខដាក់គ្នារវាងប្រជាពលរដ្ឋ និងមន្ត្រីសហព័ន្ធ កាន់តែតានតឹងខ្លាំងឡើង បន្ទាប់ពីភ្នាក់ងារអនុវត្តច្បាប់អន្តោប្រវេសន៍ និងគយ (ICE) ម្នាក់ បានបាញ់សម្លាប់ពលរដ្ឋអាមេរិកម្នាក់ ឈ្មោះនាង Renee Good នៅក្នុងរថយន្ត កាលពីសប្ដាហ៍មុន នៅទីក្រុង Minneapolis ហើយការតវ៉ាយ៉ាងខឹងសម្បារបានរីករាលដាលដល់ទីក្រុងដទៃទៀត។

លោក Trump បានសរសេរសារព្រមានលើបណ្តាញសង្គមថា «ប្រសិនបើក្រុមអ្នកនយោបាយពុករលួយនៃរដ្ឋ Minnesota មិនគោរពច្បាប់ ហើយមិនបញ្ឈប់អ្នកញុះញង់ និងអ្នកបះបោរដែលមានជំនាញវិជ្ជាជីវៈ កុំឱ្យវាយប្រហារលើក្រុមអ្នកស្នេហាជាតិ I.C.E. ដែលគ្រាន់តែព្យាយាមធ្វើការងាររបស់ពួកគេទេនោះ លោកនឹងលើកយកមកប្រើនូវច្បាប់ស្តីពីការបះបោរ»។

ការគំរាមកំហែងចុងក្រោយបង្អស់របស់លោក Trump នេះ បានកើតឡើងត្រឹមតែប៉ុន្មានម៉ោងប៉ុណ្ណោះ បន្ទាប់ពីករណីបាញ់ប្រហារមួយផ្សេងទៀត ដែលមន្ត្រីអន្តោប្រវេសន៍ម្នាក់ បានបាញ់បុរសជនជាតិវេណេស៊ុយអេឡាម្នាក់ត្រូវចំជើង ក្នុងពេលភ្នាក់ងារព្យាយាមបញ្ឈប់យានយន្តរបស់បុរសរូបនោះនៅទីក្រុង Minneapolis ដែលជំរុញឱ្យកំហឹង កាន់តែពុះកញ្ជ្រោលឡើង៕