បាត់ដំបង ៖ លោក ញឹក សារ៉ែន អភិបាលស្រុកគាស់ក្រឡ ខេត្តបាត់ដំបង និងបងប្អូនប្រជាពលរដ្ឋជាង៥០គ្រួសារនៅស្រុកគាស់ក្រឡស្នើសុំកិច្ចអន្តរាគមន៍ទៅក្រសួងមហាផ្ទៃ និងសម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាក្នុងករណីដីធ្លីជាងប្រាំរយហិកតា ដែលស្ថិតនៅភូមិកាប់ព្រិច និងភូមិកុយវែង ឃុំព្រះផុស ស្រុកគាស់ក្រឡ ខេត្តបាត់ដំបងខណៈដីនេះត្រូវបានស្រ្តី ឈ្មោះ ចាន់ ហឿ និងក្រុមគ្រួសាររំលោភបំពានដោយមិនខ្លាចច្បាប់នោះ។

 ក្នុងកិច្ចសម្ភាសន៍ជាមួយទូរទស្សន៍BTVលោកអភិបាលស្រុក បានបញ្ជាក់ថាក្នុងករណីទំនាស់ដណ្ដើមសិទ្ធិនេះប្រជាពលរដ្ឋបានដាក់ពាក្យបណ្តឹងមកអាជ្ញាធរគ្រប់សំដាប់ថ្នាក់ ក្នុងនោះរដ្ឋបាលស្រុក ក៏បានធ្វើការសម្របសម្រួលជាច្រើនលើកច្រើនសារ ហើយក៏ពិនិត្យឃើញថា ប្រជាពលរដ្ឋ មានលិខិតកាន់កាប់ដីធ្លីបពា្ជក់ដោយអាជ្ញាធរឃុំ ជាង១៦០គ្រួសារ ជាមួយគ្នានោះដែររដ្ឋបាលស្រុកបានចេញ សេចក្តីជូនដំណឹងក្នុងគោលបំណងដើម្បីទប់ស្កាត់រាល់សកម្មភាពការរីករាលដាល នៃទំនាស់ដណ្ដើមសិទ្ធិ ដើម្បីរង់ចាំការសម្របសម្រួលដោះស្រាយពីអាជ្ញាធរគ្រប់លំដាប់ថ្នាក់ផងដែរ។ ប៉ុន្តែស្រ្តីឈ្មោះ ចាន់ ហឿ មិនគោរព និងអនុវត្តតាមសេចក្តីជូនដំណឹងរបស់រដ្ឋបាលស្រុកនោះទេ នៅតែបន្តសាងសង់ផ្ទះ និងខ្ទម លើដីរបស់បងប្អូនប្រជាពលរដ្ឋ និងថែមទាំងបានប្ដឹងប្រជាពលរដ្ឋនៅសាលាដំបូងខេត្តបាត់ដំបងទៀត។

​ជាមួយគ្នានោះដែរបងប្អូនប្រជាពលរដ្ឋ ដែលរងគ្រោះនោះក៏បានគោរពស្នើសុំកិច្ចអន្តរាគមន៍ពីសម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា និងក្រសួងមហាផ្ទៃផងដែរ បន្ទាប់ពីស្រ្តីឈ្មោះ ចាន់ ហឿនេះដើររលោភយកផ្ទះសម្បែង ដីធ្លីអាស្រ័យផលដែលពួកគាត់ខំដាំដុះជាយូរមកហើយនោះ។

បងប្អូនប្រជាពលរដ្ឋបានលើកឡើងទៀតថា ដីធ្លីពួកគាត់ស្ទើរគ្រប់ទីតាំងត្រូវបានស្រ្តី ឈ្មោះ ចាន់ ហឿ និងក្រុមគ្រួសាររំលោភបំពានយ៉ាងងងើលយកជាបន្តបន្ទាប់ ខណៈស្រ្តី ឈ្មោះ ចាន់ ហឿ មិនដែលទទួលយកការសម្របសម្រួលពីអាជ្ញាធរម្ដងណាឡើយ។

បងប្អូនប្រជាពលរដ្ឋរងគ្រោះបានទទូចគោរពស្នើសុំសម្ដេចតេជោ ហ៊ុន សែន មេត្តាជួយអន្តរាគមន៍ដោះស្រាយជូនពួកគាត់ ខណៈអាជ្ញាធរគ្រប់លំដាប់ធ្វើការដោះស្រាយនិងសម្របសម្រួលជាបន្តបន្ទាប់ប៉ុន្តែគ្មានប្រសិទ្ធិភាពឡើយ ហើយស្រ្តីឈ្មោះ ចាន់ ហឿ នេះនៅតែលួយបន្តធ្វើរោងដីរបស់ពួកគាត់ដោយគ្មាន ខ្លាចអ្វីទាល់តែសនោះ៕​អត្ថបទ ៖ បាន ចក់