យោធាអ៊ីស្រាអែលកាលពីថ្ងៃព្រហស្បតិ៍ ទី១៥ ខែមករា បាននិយាយថា ខ្លួនបានវាយប្រហារតាមអាកាសទៅលើគោលដៅក្រុមហេសបូឡាភ្លាមៗបន្ទាប់ពីបានចេញបទបញ្ជាជម្លៀសសម្រាប់ភូមិ Sohmor នៅភាគខាងត្បូងប្រទេសលីបង់។ យោធាបាននិយាយនៅក្នុងសេចក្តីថ្លែងការណ៍ថា «ក្នុងការឆ្លើយតបទៅនឹងការរំលោភបំពានដដែលៗរបស់ក្រុមហេសបូឡាលើកិច្ចព្រមព្រៀងបទឈប់បាញ់ យោធាអ៊ីស្រាអែលកំពុងវាយប្រហារលើគោលដៅភេរវករក្រុមហេសបូឡានៅក្នុងតំបន់ជាច្រើននៅប្រទេសលីបង់»។

កាលពីព្រឹកថ្ងៃព្រហស្បតិ៍ កងទ័ពបានព្រមានដល់ប្រជាជននៅភូមិ Sohmor ឱ្យជម្លៀសចេញពីតំបន់មួយចំនួនមុនពេលវាយប្រហារលើគោលដៅក្រុមហេសបូឡា។ មិនយូរប៉ុន្មានបន្ទាប់ពីយោធាបានប្រកាសថាវាយប្រហារទីតាំងនានាក្នុងប្រទេសលីបង់ អ្នកនាំពាក្យភាសាអារ៉ាប់របស់ខ្លួន លោក Avichay Adraee បានព្រមានអំពីបទបញ្ជាជម្លៀសលើកទីពីរ ដែលលើកនេះសម្រាប់ភូមិ Machghara នៅភាគខាងត្បូងប្រទេសលីបង់។

លោក Adraee បាននិយាយនៅលើបណ្តាញ X ថា «យោធាអ៊ីស្រាអែល នឹងវាយប្រហារហេដ្ឋារចនាសម្ព័ន្ធយោធារបស់ក្រុមភេរវករហេសបូឡានាពេលដ៏ខ្លីខាងមុខនេះ»។ បទបញ្ជាទាំងនេះ បានធ្វើឡើងមួយសប្តាហ៍បន្ទាប់ពីយោធាលីបង់បាននិយាយថា ខ្លួនបានបញ្ចប់ការដកហូតអាវុធពីក្រុមហេសបូឡា នៅភាគខាងត្បូងទន្លេ Litani ដែលជាដំណាក់កាលដំបូងនៃផែនការនៅទូទាំងប្រទេស ទោះបីជាអ៊ីស្រាអែលបានហៅកិច្ចខិតខំប្រឹងប្រែងទាំងនោះថាមិនគ្រប់គ្រាន់ក៏ដោយ។

ការិយាល័យរបស់នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយក្នុងការឆ្លើយតបថា បទឈប់បាញ់ «បានបញ្ជាក់យ៉ាងច្បាស់ថាក្រុមហេសបូឡា ត្រូវតែរំសាយហូតអាវុធទាំងស្រុង»។ អ៊ីស្រាអែលបានបន្តវាយប្រហារជាប្រចាំនៅក្នុងប្រទេសលីបង់ ទោះបីជាមានបទឈប់បាញ់កាលពីខែវិច្ឆិកា ឆ្នាំ២០២៤ ក៏ដោយ។