អត្ថបទបែបវិភាគរបស់សារព័ត៌មាន BBC បានរាយការណ៍នៅថ្ងៃសុក្រ (១៦ មករា) នេះ ដោយលើកឡើងអំពីភាពមិនអាចទាយទុកជាមុនបានរបស់លោកប្រធានាធិបតីអាមេរិក Donald Trump ជាពិសេសលើបញ្ហាអ៊ីរ៉ង់ ដែលពិភពលោកកំពុងតែតាមដានយ៉ាងដិតដល់។ អស់រយៈពេលជិត ២សប្តាហ៍មកហើយ លោក Trump ហាក់ដូចជាបង្ហាញគ្រប់គ្នាថា អន្តរាគមន៍នៅអ៊ីរ៉ង់ ខិតកាន់តែជិតហើយ។

ចាប់តាំងពីការគំរាមកំហែងរបស់លោកនៅថ្ងៃទី២ ខែមករា ដែលថានឹងទៅ "ជួយសង្គ្រោះ" ក្រុមបាតុករ ប្រសិនបើអាជ្ញាធរអ៊ីរ៉ង់ ប្រើអំពើហិង្សាប្រឆាំងនឹងពួកគេ រហូតដល់ការសន្យារបស់លោកនៅសប្តាហ៍នេះ ដែលថា «ជំនួយជិតទៅដល់ហើយ» — ប្រធានាធិបតីអាមេរិករូបនេះ ហាក់ដូចជាមានជំហរម៉ឺងម៉ាត់បំផុតលើអ៊ីរ៉ង់។

នៅថ្ងៃអង្គារសប្ដាហ៍នេះ លោកប្រាប់អ្នកសារព័ត៌មានថា «ប្រសិនបើអ៊ីរ៉ង់ប្រហារជីវិតបាតុករ នោះអាមេរិកនឹងចាត់វិធានការយ៉ាងខ្លាំងក្លាបំផុត» ដោយនិយាយថា គោលដៅចុងក្រោយរបស់លោកនៅអ៊ីរ៉ង់គឺ «ដើម្បីឈ្នះ»។ ក្រោយមកទៀត ពេញមួយថ្ងៃពុធសប្ដាហ៍នេះដដែល មានសញ្ញាកាន់តែច្រើនឡើងៗថា សកម្មភាពយោធារបស់សហរដ្ឋអាមេរិក អាចនឹងកើតឡើងជាក់ជាមិនខាន។

ប៉ុន្តែបន្ទាប់មក លោក Trump ស្រាប់តែផ្លាស់ប្តូរវោហាសាស្រ្តពេលថ្លែងនៅសេតវិមាន ដោយនិយាយថា «លោកទទួលដំណឹងថាការកាប់សម្លាប់នៅអ៊ីរ៉ង់ កំពុងឈប់ហើយ» ក្នុងសុន្ទរកថាបែបបន្ធូរបន្ថយភាពតានតឹងមួយ។ ទោះជាបែបនេះក្ដី លោក Trump មិនបានច្រានចោលសកម្មភាពយោធាទេ ដោយនិយាយថា លោកនឹង «តាមដានមើលដំណើរការនេះសិន» មុនសម្រេចចិត្តថាត្រូវធ្វើអ្វីបន្ទាប់។ ភាពមិនទៀតទាត់ទាំងនេះ បានបង្ហាញឱ្យឃើញថា គោលបំណងរបស់លោកប្រធានាធិបតី Trump ហាក់ដូចជាទុកឱ្យអ្នកគ្រប់គ្នាបន្តងឿងឆ្ងល់ ដោយនឹកស្មានមិនដល់ពីអ្វីដែលលោកនឹងធ្វើបន្ទាប់៕