អារ៉ាប៊ីសាអ៊ូឌីត បានប្រកាសពីគម្រោងអភិវឌ្ឍន៍មួយចំនួននៅទូទាំងភាគខាងត្បូងប្រទេសយេម៉ែន មានតម្លៃប្រហែល ៥០០លានដុល្លារ ដែលភាគច្រើនធ្លាប់ស្ថិតក្នុងតំបន់កាន់កាប់ជាយូរមកហើយដោយអេមីរ៉ាតអារ៉ាប់រួម និងក្រុមផ្ដាច់ខ្លួនសម្ព័ន្ធមិត្ត ដែលត្រូវបានកម្ចាត់ចោលក្នុងការវាយលុកមួយ គាំទ្រដោយអារ៉ាប៊ីសាអ៊ូឌីត ក្នុងខែមករានេះ និងបន្ទាប់ពីអារ៉ាប់រួម បានដកកម្លាំងសេសសល់របស់ខ្លួនពីទីនោះ។

ជំហាននេះបង្ហាញពីឥរិយាបថកាន់តែម៉ឺងម៉ាត់ឡើងដោយព្រះរាជាណាចក្រអារ៉ាប់ឈូងសមុទ្រមួយនេះនៅយេម៉ែន ក្នុងជម្លោះជាមួយអារ៉ាប់រួម។ ក្រុមប្រឹក្សាអន្តរកាលភាគខាងត្បូង (STC) ដែលជាក្រុមផ្ដាច់ខ្លួន បានវាយលុកឆ្លងកាត់ផ្នែកខ្លះនៃយ៉េមែន កាលពីឆ្នាំមុន ហើយបានរុលទៅកៀកនឹងព្រំដែនអារ៉ាប៊ីសាអ៊ូឌីត។ ទីក្រុងរីយ៉ាដ បានប្រកាសថា ជំហាននេះជាការគំរាមកំហែងដល់សន្តិសុខជាតិរបស់ខ្លួន ដោយបានអំពាវនាវឱ្យអារ៉ាប់រួមដកកម្លាំងថយ និងបានគាំទ្រការវាយលុកមួយ ដែលបានបោសសម្អាតក្រុម STC ចេញពីអំណាច។

ក្នុងសារបណ្ដាញសង្គមកាលពីថ្ងៃពុធ (១៤ មករា) សប្ដាហ៍នេះ រដ្ឋមន្ត្រីក្រសួងការពារជាតិអារ៉ាប៊ីសាអ៊ូឌីត លោក Khalid bin Salman បាននិយាយថា លោកបានជួបជាមួយប្រមុខរដ្ឋាភិបាលយ៉េមែន ដែលទទួលស្គាល់ដោយអន្តរជាតិ ដើម្បីបញ្ជាក់ពីការគាំទ្ររបស់អារ៉ាប៊ីសាអ៊ូឌីត។ សារបង្ហោះដដែលនេះ ក៏បានប្រកាសពីជំនួយ និងគម្រោងនានាទូទាំងខេត្តចំនួន១០ រួមទាំងការសាងសង់មន្ទីរពេទ្យ សាលារៀន និងផ្លូវថ្នល់ និងការបរិច្ចាគប្រេងឥន្ធនៈដើម្បីបង្កើនការផលិតថាមពល។

កាលពីមុន អារ៉ាប៊ីសាអ៊ូឌីត និងអារ៉ាប់រួម ធ្លាប់ធ្វើការជាមួយគ្នាក្នុងក្រុមចម្រុះមួយ ប្រយុទ្ធប្រឆាំងនឹងក្រុមសកម្មប្រយុទ្ធហ៊ួទី ដែលគាំទ្រដោយអ៊ីរ៉ង់ ក្នុងសង្គ្រាមស៊ីវិលនៅយេម៉ែន។ ប៉ុន្តែមហាអំណាចឈូងសមុទ្រដ៏ធំបំផុតទាំងពីរនេះ មានគំនិតខុសគ្នាយ៉ាងខ្លាំងលើបញ្ហាជាច្រើននៅទូទាំងមជ្ឈិមបូព៌ា - រាប់ចាប់ពីភូមិសាស្ត្រនយោបាយ រហូតដល់ទិន្នផលប្រេង - ហើយភាពរកាំរកូសបានផ្ទុះឡើងកាន់តែធំ ជុំវិញការវាយរុលទៅមុខរបស់ក្រុម STC នៅយ៉េមែន៕