ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ លោក Vassily Nebenzia បាននិយាយកាលពីថ្ងៃព្រហស្បតិ៍ថា ប្រទេសរបស់លោកថ្កោលទោសចំពោះការជ្រៀតជ្រែកពីខាងក្រៅគ្រប់ទម្រង់ទាំងអស់ ការញុះញង់ឲ្យមានអំពើហិង្សា និងការគំរាមកំហែងប្រើប្រាស់កម្លាំងប្រឆាំងនឹងអ៊ីរ៉ង់។

នៅក្នុងកិច្ចប្រជុំក្រុមប្រឹក្សាសន្តិសុខស្តីពីស្ថានភាពនៅក្នុងប្រទេសអ៊ីរ៉ង់ លោក Nebenzia បានអំពាវនាវឲ្យសហរដ្ឋអាមេរិកបញ្ចប់សកម្មភាពបង្កភាពតានតឹងរបស់ខ្លួន។

លោកបានកត់សម្គាល់ថា៖«វោហាសាស្ត្រដ៏គ្រោះថ្នាក់ខ្លាំង និងមិនទទួលខុសត្រូវ» ក្នុងរយៈពេលប៉ុន្មានថ្ងៃថ្មីៗនេះដោយថ្នាក់ដឹកនាំសហរដ្ឋអាមេរិក បានអំពាវនាវដោយបើកចំហឲ្យមានការដណ្តើមកាន់កាប់ ស្ថាប័នរដ្ឋរបស់អ៊ីរ៉ង់ និងការគំរាមកំហែង ដើម្បីជួយក្រុមបាតុករ។

ឯកអគ្គរដ្ឋទូតរូបនេះ បាននិយាយថា៖«សេចក្តីថ្លែងការណ៍បែបនេះ មិនមានអ្វីក្រៅពីការញុះញង់ឲ្យផ្តួលរំលំសណ្តាប់ធ្នាប់រដ្ឋធម្មនុញ្ញរបស់រដ្ឋអធិបតេយ្យមួយដោយហិង្សានោះទេ»។

លោក Nebenzia បាននិយាយថា៖«អ្វីដែលកំពុងកើតឡើងនៅក្នុងប្រទេសអ៊ីរ៉ង់ គឺជាឧទាហរណ៍មួយទៀតនៃការប្រើប្រាស់វិធីសាស្រ្តដែលបានសាកល្បង និងធ្វើតេស្តសម្រាប់បដិវត្តន៍ពណ៌ ដែលអ្នកញុះញង់ប្រដាប់អាវុធដែលបានទទួលការបណ្តុះបណ្តាលពិសេស បានប្រែក្លាយការតវ៉ាដោយសន្តិវិធី ទៅជាអំពើហិង្សាដែលខ្វះការពិចារណា»។

លោកបានកត់សម្គាល់ថា៖«ដូចដែលយើងបានឃើញម្តងហើយម្តងទៀតនៅក្នុងរដ្ឋមួយចំនួន សកម្មភាពទាំងអស់នេះ ត្រូវបានដឹកនាំ ឬគាំទ្រដោយកម្លាំងខាងក្រៅ ដែលមានចំណាប់អារម្មណ៍លើអ្វីដែលហៅថាការផ្លាស់ប្តូររបប»៕