អាជ្ញាធរអ៊ីស្រាអែលបានចាប់ខ្លួនជនជាតិប៉ាឡេស្ទីន ៨០នាក់ និងរុះរើផ្ទះមួយខ្នង និងហាមឃាត់រដ្ឋមន្ត្រីទទួលបន្ទុកកិច្ចការក្រុងហ្ស៊េរុយសាឡឹមរបស់អាជ្ញាធរប៉ាឡេស្ទីន មិនឲ្យចូលទៅក្នុងតំបន់វេសបែង ( West Bank)។ នេះបើយោងតាមប្រភពព័ត៌មានប៉ាឡេស្ទីនកាលពីថ្ងៃព្រហស្បតិ៍។

ក្លិបអ្នកទោសប៉ាឡេស្ទីន ដែលជាអង្គការមិនមែនរដ្ឋាភិបាលមួយ បាននិយាយនៅក្នុងសេចក្តីចេញផ្សាយ ព័ត៌មានមួយថា កងទ័ពអ៊ីស្រាអែលបានបើកប្រតិបត្តិការចាប់ខ្លួន និងសួរចម្លើយយ៉ាងទូលំទូលាយ ចាប់ពីល្ងាចថ្ងៃពុធរហូតដល់ព្រឹកថ្ងៃព្រហស្បតិ៍ ដោយកំណត់គោលដៅលើជនជាតិប៉ាឡេស្ទីន ៨០នាក់ ក្នុងនោះមានស្ត្រីម្នាក់ កុមារពីរនាក់ និងអតីតអ្នកជាប់ឃុំឃាំង។

សេចក្តីថ្លែងការណ៍នេះ បានបញ្ជាក់ថា ការចាប់ខ្លួន និងការសួរចម្លើយនៅតំបន់នេះ បានកើតឡើងនៅក្នុងទីក្រុងភាគច្រើននៅតំបន់វេសបែង ដោយមានការផ្តោតទៅលើទីក្រុង Hebron និង Jenin ដោយបាន បន្ថែមថា កងកម្លាំងអ៊ីស្រាអែលបានបង្កើនប្រតិបត្តិការចាប់ខ្លួន និងសួរចម្លើយក្នុងល្បឿនកើនឡើង ចាប់តាំងពីដើមឆ្នាំ ២០២៦។

កងទ័ពអ៊ីស្រាអែល ធ្វើយុទ្ធនាការចាប់ខ្លួន និងវាយឆ្មក់ស្ទើរតែរាល់ថ្ងៃ នៅតំបន់វេសបែង ដោយកំណត់គោលដៅទៅលើជនជាតិប៉ាឡេស្ទីនដែលខ្លួនពិពណ៌នាថា ជា «អ្នកដែលត្រូវគេស្វែងរកចាប់ខ្លួន» ខណៈដែលជនជាតិប៉ាឡេស្ទីននិយាយថា ប្រតិបត្តិការនេះជារឿយៗកំណត់គោលដៅលើជនស៊ីវិល។

ទន្ទឹមនឹងនេះ កងកម្លាំងអ៊ីស្រាអែលបានវាយកម្ទេចផ្ទះរបស់យុវជនប៉ាឡេស្ទីន Imran al-Atrash អាយុ ១៨ ឆ្នាំ នៅទីក្រុង Hebron ភាគខាងត្បូងនៃតំបន់វេសបែង។ នេះបើយោងតាមប្រភពសន្តិសុខប៉ាឡេ ស្ទីន។

ប្រភពព័ត៌មាន បានប្រាប់សារព័ត៌មានស៊ីនហួថា កងកម្លាំងអ៊ីស្រាអែល បានវាយលុកតំបន់ Khallat Nafisa នៃទីក្រុង Hebron បិទតំបន់នេះ និងវាយឆ្មក់ផ្ទះមួយជាន់របស់គ្រួសារយុវជន al-Atrash ដោយបង្ខំឲ្យក្រុមគ្រួសារត្រូវជម្លៀសចេញ មុនពេលវាយកម្ទេចផ្ទះនេះដោយប្រើគ្រឿងចក្រឈូសឆាយ៕