ប្រធានអាជ្ញាធរប៉ាឡេស្ទីន (PA)លោក ម៉ាខ្មូដ អាបាស ( Mahmoud Abbas) បាននិយាយកាលពីថ្ងៃព្រហស្បតិ៍ថា ប៉ាឡេស្ទីនប្តេជ្ញាបន្តកិច្ចខិតខំប្រឹងប្រែងរបស់ខ្លួន ជាមួយប្រធានាធិបតីអាមេរិក លោក ដូណាល់ ត្រាំ (Donald Trump) និងដៃគូពាក់ព័ន្ធផ្សេងទៀត។

លោកបានសម្តែងក្តីសង្ឃឹមថា ឆ្នាំ ២០២៦ នឹងឃើញវឌ្ឍនភាពឆ្ពោះទៅរកការដោះស្រាយបុព្វហេតុប៉ាឡេស្ទីន ដោយលើកឡើងពីសំណើវិជ្ជមានពីរដ្ឋបាលអាមេរិក។

លោកបានថ្លែងក្នុងពិធីអបអរសាទរការទទួលបានសញ្ញាបត្របណ្ឌិតកិត្តិយសពីសាកលវិទ្យាល័យអារ៉ាប់អាមេរិក នៅក្នុងទីក្រុងរ៉ាម៉ាឡា (Ramallah)។

លោក អាបាស បាននិយាយថា រដ្ឋប៉ាឡេស្ទីនបានប្រកាសគាំទ្រការបង្កើតគណៈកម្មាធិការរដ្ឋបាលប៉ាឡេស្ទីននៅតំបន់ហ្កាហ្សា ក្នុងដំណាក់កាលអន្តរកាល។

លោកបានសម្តែងការកោតសរសើរចំពោះកិច្ចខិតខំប្រឹងប្រែងរបស់លោក ត្រាំ និងអ្នកសម្របសម្រួល អេហ្ស៊ីប កាតា និងទួរគី និងសម្រាប់ការឈានទៅរកការអនុវត្តដំណាក់កាលទី ២ នៃផែនការរបស់លោក ត្រាំ។

លោក អាបាស បានបញ្ជាក់ជាថ្មីអំពីសារៈសំខាន់នៃការភ្ជាប់ស្ថាប័ននានារបស់ PA នៅតំបន់វេសបែង និង ហ្កាហ្សា ដោយសង្កត់ធ្ងន់លើតម្រូវការ ដើម្បីជៀសវាងការបង្កើតប្រព័ន្ធរដ្ឋបាល ច្បាប់ ឬសន្តិសុខស្របគ្នាដែលនឹងធ្វើឲ្យមានការបែកបាក់។

លោកបានគូសបញ្ជាក់ពីចក្ខុវិស័យនយោបាយរបស់ខ្លួន ដោយផ្អែកលើសិទ្ធិរបស់ប្រជាជនប៉ាឡេស្ទីន ក្នុងការសម្រេចចិត្តដោយខ្លួនឯង និងការវិលត្រឡប់ទៅវិញ ព្រមទាំងការបង្កើតរដ្ឋប៉ាឡេស្ទីនឯករាជ្យ និងមានអធិបតេយ្យភាពពេញលេញ ដោយមានទីក្រុងហ្ស៊េរុយសាឡឹមខាងកើតជារដ្ឋធានី ដោយរស់នៅក្នុងសន្តិភាព និងសន្តិសុខជាមួយប្រទេសជិតខាង៕