ប្រមុខអង្គការសហប្រជាជាតិ (UN) កាលពីថ្ងៃព្រហស្បតិ៍ (១៥ មករា) បានថ្លែងរិះគន់យ៉ាងចាស់ដៃទៅលើប្រទេសទាំងឡាយណាដែលរំលោភបំពានច្បាប់អន្តរជាតិ ជាមួយនឹងការព្រមានអំពីពិភពលោកដ៏បែកបាក់ ហើយបានហៅ ការប្រមូលផ្តុំអំណាច និងទ្រព្យសម្បត្តិទៅលើបុគ្គលមានទ្រព្យបំផុត ១% នៅលើពិភពលោកថា «មិនអាចការពារបានខាងសីលធម៌»។

នៅពេលចាប់ផ្តើមឆ្នាំចុងក្រោយរបស់លោកក្នុងតំណែងប្រធានអង្គការសហប្រជាជាតិ លោកអគ្គលេខាធិការ Antonio Guterres បានប្រាប់មហាសន្និបាតអង្គការសហប្រជាជាតិថា ប្រទេសជាសមាជិកចំនួន ១៩៣ របស់ស្ថាប័ននេះ កំពុងតែប្រឈមនឹង «ពិភពលោកមួយ ដែលរងភាពបែកបាក់ខាងភូមិសាស្ត្រនយោបាយ ការរំលោភបំពានច្បាប់អន្តរជាតិដ៏ឥតប្រយោជន៍ និងការកាត់បន្ថយជំនួយអភិវឌ្ឍន៍ និងជំនួយមនុស្សធម៌ទាំងស្រុង»។

លោក Guterres ដែលអាណត្តិ ៥ឆ្នាំលើកទីពីររបស់លោកនឹងបញ្ចប់នៅថ្ងៃទី៣១ ខែធ្នូ ឆ្នាំ២០២៦នេះ បាននិយាយទៀតថា កម្លាំងជំរុញទាំងអស់នេះហើយកំពុងបង្កភាពរង្គោះរង្គើដល់គ្រឹះនៃកិច្ចសហប្រតិបត្តិការសកល នៅពេលវេលាចាំបាច់បំផុត។

លោក Guterres បានលើកឡើងថា «នៅពេលដែលមេដឹកដើររំលងច្បាប់អន្តរជាតិ ហើយជ្រើសរើសដោយខ្លួនឯងនូវច្បាប់ណាដែលត្រូវអនុវត្តតាម នោះពួកគេមិនត្រឹមតែធ្វើឱ្យខូចសណ្តាប់ធ្នាប់ពិភពលោកប៉ុណ្ណោះទេ ថែមទាំងកំពុងបង្កើតគំរូដ៏គ្រោះថ្នាក់មួយផងដែរ»៕