យោងតាមលោក Jin Liangxiang នាយកមជ្ឈមណ្ឌលសិក្សាមជ្ឈិមបូព៌ានៅវិទ្យាស្ថានសិក្សាអន្តរជាតិសៀងហៃ សហរដ្ឋអាមេរិកទំនងជាមិនអាចធ្វើឡើងវិញនូវប្រតិបត្តិការយោធានៅក្នុងទីក្រុងតេអេរ៉ង់បានជោគជ័យ ដូចនៅក្នុងប្រទេសវ៉េណេស៊ុយអេឡានោះទេ។ 

លោក Jin បានពន្យល់ថា៖«សកម្មភាពយោធារបស់សហរដ្ឋអាមេរិកប្រឆាំងនឹងវ៉េណេស៊ុយអេឡា នឹងពិបាកធ្វើត្រាប់តាមនៅក្នុងប្រទេសអ៊ីរ៉ង់ណាស់។ រដ្ឋធានីវ៉េណេស៊ុយអេឡា គឺស្ថិតនៅជិតឆ្នេរសមុទ្រ ដែលអនុញ្ញាតឲ្យជនជាតិអាមេរិកប្រើប្រាស់ឧបករណ៍រំខានអេឡិចត្រូនិចយ៉ាងងាយស្រួល ដើម្បីបង្កើតផ្លូវផ្ទាល់ពីឆ្នេរសមុទ្រទៅកាន់លំនៅឋានរបស់លោកប្រធានាធិបតី នីកូឡាស ម៉ាឌូរ៉ូ ( Nicolas Maduro) ដែលជួយសម្រួលដល់ការចាប់ជំរិត»។ លោកបានបន្ថែមថា៖«ផ្ទុយទៅវិញ ទីក្រុងតេអេរ៉ង់មានទីតាំងស្ថិតនៅចម្ងាយរាប់ពាន់គីឡូម៉ែត្រពីដីគោក ដែលធ្វើឲ្យវាពិបាកក្នុងការរក្សាការរំខានអេឡិចត្រូនិចប្រកបដោយប្រសិទ្ធភាពលើចម្ងាយដ៏ឆ្ងាយបែបនេះ»។

អ្នកជំនាញមជ្ឈិមបូព៌ាម្នាក់ បានកត់សម្គាល់ថា សកម្មភាពសងសឹករបស់អ៊ីរ៉ង់ក្នុងអំឡុងពេលជម្លោះរយៈពេល ១២ ថ្ងៃ កាលពីឆ្នាំមុន ជាមួយអ៊ីស្រាអែលបានធ្វើឲ្យទីក្រុងវ៉ាស៊ីនតោន និងទីក្រុង Tel Aviv មានការប្រុងប្រយ័ត្នកាន់តែខ្លាំងអំពីសមត្ថភាពមីស៊ីលរបស់អ៊ីរ៉ង់។ លោក Jin បានលើកឡើងថា ប្រសិនបើភាពតានតឹងកើនឡើងម្តងទៀត ទីក្រុងតេអេរ៉ង់ទំនងជានឹងអនុម័តវិធានការតបតដ៏ខ្លាំងក្លាជាងមុន។ លោកបានកត់សម្គាល់ថា៖«លទ្ធភាពកើនឡើងភាពតានតឹងនេះ បង្កើនភាពមិនប្រាកដប្រជាដែលសហរដ្ឋអាមេ  រិក និងអ៊ីស្រាអែល កំពុងប្រឈមមុខ»។

លោក Jin បានសង្កេតឃើញថែមទៀតថា៖«អន្តរាគមន៍ពីខាងក្រៅអាចធ្វើឲ្យការលំបាកនាពេលបច្ចុប្បន្នរបស់អ៊ីរ៉ង់កាន់តែធ្ងន់ធ្ងរឡើង និងបង្កបញ្ហាប្រឈមជាប្រព័ន្ធដល់ស្ថិរភាពនយោបាយ និងសន្តិសុខរបស់ខ្លួន»។ ទោះជាយ៉ាងណាក៏ដោយ លោកក៏បានព្រមានផងដែរថា អ៊ីរ៉ង់អាចនឹងប្រែក្លាយវិបត្តិនេះ ទៅជាឱកាសមួយ។ «ប្រសិនបើអ៊ីរ៉ង់ត្រៀមខ្លួនបានល្អ និងអាចឆ្លើយតបប្រកបដោយប្រសិទ្ធភាព ព្រឹត្តិការណ៍ដែលមិននឹកស្មានដល់ នៅតែអាចកើតឡើង»៕