លោកស្រី Delcy Rodriguez ប្រធានាធិបតីស្តីទីប្រទេសវ៉េណេស៊ុយអេឡាបាននិយាយកាលពីថ្ងៃព្រហស្បតិ៍ថា រដ្ឋាភិបាលមិនខ្លាចក្នុងការចូលរួមការចរចាផ្នែកការទូតជាមួយសហរដ្ឋអាមេរិកទេ បន្ទាប់ពីការវាយប្រហារដោយយោធារបស់សហរដ្ឋអាមេរិកលើប្រទេសអាមេរិកខាងត្បូងមួយនេះ និងការចាប់ខ្លួនប្រធានាធិបតី លោក Nicolas Maduro និងភរិយារបស់លោក។

លោកស្រី Rodriguez បាននិយាយក្នុងអំឡុងពេលធ្វើបទបង្ហាញប្រចាំឆ្នាំស្តីពីស្ថានភាពប្រទេសថា «យើងមិនខ្លាចផ្នែកការទូតទេ»។ ខណៈបានបញ្ជាក់ពី «កំណត់ត្រាជាប្រវត្តិសាស្ត្រ» នៃការជ្រៀតជ្រែករបស់ទីក្រុងវ៉ាស៊ីនតោននៅអាមេរិកឡាទីន លោកស្រីបានអះអាងថា «យើងមិនខ្លាចក្នុងការប្រឈមមុខតាមរយៈការសន្ទនានយោបាយជាលក្ខណៈការទូតនោះទេ ខណៈមានភាពសមស្រប»។

លោកស្រីនិយាយថា រដ្ឋាភិបាលកំពុងបង្កើត «គោលនយោបាយថ្មីមួយ» ដោយអំពាវនាវដល់ក្រុមអ្នកការទូតដែលមានការទទួលស្គាល់នៅក្នុងប្រទេសវ៉េណេស៊ុយអេឡាឱ្យបង្ហាញពីការពិតនៃស្ថានភាពទៅកាន់រដ្ឋាភិបាលរបស់ពួកគេ។ លោកស្រី Rodriguez ក៏បានអំពាវនាវឱ្យមានសាមគ្គីភាពនៅក្នុងប្រទេសដើម្បីការពារដែនអធិបតេយ្យភាព និងបូរណភាពទឹកដី។