នាយករដ្ឋមន្ត្រីដាណឺម៉ាក លោកស្រី Mette Frederiksen បាននិយាយវាយបកទៅនឹងការទាមទាររបស់ប្រធានាធិបតីសហរដ្ឋអាមេរិក លោក Donald Trump ក្នុងការយកដែនដី Greenland មកគ្រប់គ្រង។ លោកស្រី បានព្រមានកាលពីថ្ងៃព្រហស្បតិ៍ថា មហិច្ឆតារបស់សហរដ្ឋអាមេរិកនៅតែ «ដដែល»។

ការថ្លែងលើកឡើងរបស់លោកស្រី Frederiksen បានធ្វើឡើងមួយថ្ងៃបន្ទាប់ពីរដ្ឋមន្ត្រីការបរទេសរបស់ប្រទេសដាណឺម៉ាក និងដែនដី Greenland បានធ្វើទស្សនកិច្ចនៅសេតវិមាន ជាកន្លែងដែលក្រុមគណៈប្រតិភូជួបពិភាក្សាជាមួយអនុប្រធានាធិបតីអាមេរិក លោក JD Vance និងរដ្ឋមន្ត្រីការបរទេស លោក Marco Rubio។ ភាគីទាំងពីរ បានព្រមព្រៀងគ្នាបង្កើត «ក្រុមការងារកម្រិតខ្ពស់» ដើម្បីដោះស្រាយបញ្ហានេះ។

លោកស្រី Frederiksen បានសរសេរនៅលើបណ្តាញផ្សព្វផ្សាយសង្គមថា វាពុំមែនជាជំនួបងាយស្រួលនោះទេ ហើយការបង្កើតក្រុមនេះមិនផ្លាស់ប្តូរការពិតនៃ «ការមិនចុះសម្រុងគ្នាជាមូលដ្ឋានឡើយ»។

ដែនដី Greenland គឺជាដែនដីស្វយ័តរបស់ប្រទេសដាណឺម៉ាក។ លោកស្រី Frederiksen បាននិយាយថា ការការពារដែនដីនេះគឺជា «ក្តីបារម្ភរួម» សម្រាប់សម្ព័ន្ធយោធា NATO។ លោកស្រី បានសន្យាថានឹងបន្តកិច្ចខិតខំប្រឹងប្រែងដើម្បីការពារការយកមកគ្រប់គ្រងរបស់សហរដ្ឋអាមេរិក មិនឲ្យក្លាយជាការពិត។