អារ៉ាប៊ីសាអ៊ូឌីត កាតា និងអូម៉ង់ បានដឹកនាំកិច្ចខិតខំប្រឹងប្រែង ដើម្បីជជែកជាមួយប្រធានាធិបតីអាមេរិក លោក Donald Trump ឲ្យដកចេញនូវផែនការវាយប្រហារលើអ៊ីរ៉ង់ ដោយបារម្ភថា អាចមាន «ផលវិបាកធ្ងន់ធ្ងរ នៅក្នុងតំបន់»។ នេះបើយោងតាមមន្ត្រីជាន់ខ្ពស់អារ៉ាប៊ីសាអ៊ូឌីតម្នាក់ដែលបានប្រាប់សារព័ត៌មាន AFP កាលពីថ្ងៃព្រហស្បតិ៍ (ទី១៥ ខែមករា ឆ្នាំ២០២៦)។

អមដោយការបន្ថែមថា ការសន្ទនាកំពុងបន្តមាននោះ មន្ត្រីរូបនេះដែលបាននិយាយក្នុងលក្ខខណ្ឌមិនបញ្ចេញឈ្មោះ បានបញ្ជាក់ថា ប្រទេសឈូងសមុទ្រទាំង៣ «បានដឹកនាំកិច្ចខិតខំប្រឹងប្រែងការទូតចុងក្រោយ ដែលមានរយៈពេលយូរ និងតានតឹង ដើម្បីបញ្ចុះបញ្ចូលលោកប្រធានាធិបតី Trump ឲ្យផ្តល់ឱកាសដល់អ៊ីរ៉ង់ ដើម្បីបង្ហាញពីចេតនាល្អ»។

គួរបញ្ជាក់ថា បុគ្គលិកមួយចំនួនត្រូវបានផ្លាស់ប្តូរចេញពីមូលដ្ឋានយោធាដ៏សំខាន់មួយរបស់សហរដ្ឋអាមេរិក នៅកាតា កាលពីថ្ងៃពុធ ហើយបុគ្គលិកនៅបេសកកម្មអាមេរិក ក្នុងអារ៉ាប៊ីសាអ៊ូឌីត និងគុយវ៉ែត ត្រូវបានព្រមានឲ្យប្រុងប្រយ័ត្ន ខណៈដែលក្ដីបារម្ភមានកាន់តែខ្លាំងឡើងៗ ពាក់ព័ន្ធនឹងការវាយប្រហាររបស់សហរដ្ឋអាមេរិក ដោយសារការបង្ក្រាបរបស់អ៊ីរ៉ង់លើក្រុមបាតុករ។

មន្ត្រីអារ៉ាប៊ីសាអ៊ូឌីតបានឲ្យដឹងទៀតថា កិច្ចខិតខំប្រឹងប្រែងរបស់រដ្ឋឈូងសមុទ្រទាំងនេះ មានគោលបំណង «បញ្ចៀសកុំឲ្យមានស្ថានភាពដែលមិនអាចគ្រប់គ្រងបាននៅក្នុងតំបន់នេះ»។ មន្ត្រីរូបនេះបានបន្ថែមថា៖ «យើងបាននិយាយប្រាប់ទីក្រុងវ៉ាស៊ីនតោនថា ការវាយប្រហារលើអ៊ីរ៉ង់ នឹងបើកផ្លូវឲ្យមានផលវិបាកធ្ងន់ធ្ងរជាបន្តបន្ទាប់ នៅក្នុងតំបន់នេះ»៕