មេដឹកនាំក្រុមហ៊ួទី លោក Abdul-Malik al-Houthi បានព្រមានថា ចលនាឧទ្ទាម Ansar Allah (ហ៊ួទី) នៅប្រទេសយេម៉ែន បន្តតាមដានសកម្មភាពរបស់អ៊ីស្រាអែលនៅដែនដីសូម៉ាលីឡែន ហើយនៅតែត្រៀមខ្លួនវាយប្រហារទីតាំងណាមួយរបស់ប្រទេសនេះ នៅទីនោះ។ 

ទូរទស្សន៍ Al Masirah ដែលគ្រប់គ្រងដោយក្រុមហ៊ួទីបានដកស្រង់សម្តីលោកដែលបាននិយាយថា៖     «យើងបន្តតាមដានសកម្មភាពរបស់អ៊ីស្រាអែលនៅសូម៉ាលីឡែន ហើយកំពុងធ្វើការដើម្បីបង្កើនការត្រួតពិនិត្យរបស់យើង។ យើងត្រៀមខ្លួនវាយប្រហារវត្តមាន ឬកិច្ចសហការអ៊ីស្រាអែលណាមួយ នៅដែនដីសូម៉ាលីឡែន មិនថា ជាមូលដ្ឋានយោធា ឬគោលដៅផ្សេងទៀត ដែលយើងអាចទៅដល់»។  

លោកបានលើកឡើងថា ព្រឹត្តិការណ៍នៅសូម៉ាលីឡែនមានសារៈសំខាន់ខ្លាំងណាស់សម្រាប់ចលនាហ៊ួទី ពីព្រោះពួកគេបង្ហាញពីការគំរាមកំហែងសម្រាប់ប្រទេសយេម៉ែន។ ក្រុមឧទ្ទាមនេះជឿជាក់ថា អ៊ីស្រាអែលបានព្យាយាមទទួលបានទីតាំងឈរជើងនៅដែនដីសូម៉ាលីឡែន ដើម្បីគ្រប់គ្រងឈូងសមុទ្រ Aden និងច្រកសមុទ្រ Bab el-Mandeb។

កាលពីថ្ងៃទី ២៦ ខែធ្នូ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានប្រកាសទទួលស្គាល់សាធារណរដ្ឋសូម៉ាលីឡែនថា ជារដ្ឋឯករាជ្យ និងមានអធិបតេយ្យភាព ដោយក្លាយជាប្រទេសសមាជិកអង្គការសហប្រជាជាតិដំបូងគេ ដែលធ្វើដូច្នេះ។ សូម៉ាលីឡែន ដែលមានទីតាំងនៅភាគពាយ័ព្យនៃប្រទេសសូម៉ាលី នៅលើឆ្នេរសមុទ្រក្រហម បានប្រកាសឯករាជ្យជាឯកតោភាគីក្នុងឆ្នាំ ១៩៩១ ប៉ុន្តែមិនទាន់ទទួលបានការទទួលស្គាល់ពីអន្តរជាតិនៅឡើយទេ។ ដោយឆ្លើយតបទៅនឹងព័ត៌មាននេះ លោក al-Houthi បាននិយាយថា ក្រុមឧទ្ទាមយេម៉ែន នឹងចាត់ទុកវត្តមានរបស់អ៊ីស្រាអែលនៅក្នុងតំបន់នោះថា ជាគោលដៅយោធា៕