​បាល់ទាត់៖ ​ខ្សែប្រយុទ្ធ​បារាំង Karim Benzema ធ្វើបាន Hat-Trick ទាំងបី​គ្រាប់​របស់ខ្លួន​នៅក្នុង​វគ្គ​ទី២ ជួយ​ឱ្យ Real Madrid តាម​ពីក្រោយ​យកឈ្នះ Paris Saint Germain ឡើង​វគ្គ ៨ក្រុម​ចុងក្រោយ UEFA Champions League​។​ ​​ក្រុម​របស់លោក Mauricio Pochettino កាន់​មួយ​គ្រាប់​នាំមុខ​ពី​ជើង​ទី១ និង​រកបាន​គ្រាប់​នាំមុខ​មួយគ្រា​ប់​ទៀតនៅ​កីឡដ្ឋាន Santiago Bernabeu ដោយ Kylian Mbappe នៅ​វគ្គ​ទី១ នាទី​ទី៣៩ មានន័យថា PSG នាំមុខ ២គ្រាប់​សរុប​ទាំងពីរ​ជើង​។​

​​តែ​កំហុស​របស់​អ្នកចាំទី​អ៊ីតាលី Giangluigi Donnaruma ធ្វើឱ្យ Real Madrid តាម​បាន​មួយ​គ្រាប់​វិញ​នៅ​នាទី​ទី៦១ ដោយ Karim Benzema​។ ​​ក្រោយពីរ​គ្រាប់​កើតឡើង​ក្នុង​រយៈពេល ២នាទី​ប៉ុណ្ណោះ​ពោលគឺ​ខ្សែប្រយុទ្ធ​បារាំង Karim Benzema រកបាន​ពីរ​គ្រាប់​ផ្ទួនៗ​បន្ថែម​ដែល​សរុប​ជា​គ្រាប់ Hat-Trick របស់ខ្លួន​ឱ្យ Real Madrid យកឈ្នះ​ជើង​ទី២ នេះ ៣-១ និង​សរុប​ទាំងពីរ​ជើង ៣-២​។ ​​បរាជ័យ​នេះ​បានធ្វើឱ្យ Paris Saint Germain នឹក​ឃើញ​ពី​ប្រវត្តិ​ឈឺចាប់​របស់ខ្លួន​នៅ​ទឹកដី​អេ​ស្ប៉ា​ញ​ដែល​ធ្លាប់យកឈ្នះ Barcelona ៤-០ នៅ​ទីក្រុង​ប៉ារីស ​តែ​ត្រលប់មក​ចាញ់​នៅ​អេ​ស្ប៉ា​ញ​វិញ ៦-១ កាលពី​ឆ្នាំ២០១៧​។

​​PSG កំពុង​នាំមុខគេ​ដាច់​នៅ​ក្របខណ្ឌ​បារាំង Ligue 1 និង​ជា​ជើងឯក ៧លើក​ក្នុងចំណោម ៩រដូវ​កាល​មកហើយ​នៅក្នុង​ស្រុក តែ​អនាគត​របស់​អ្នកចាត់ការ Mauricio Pochettino នឹងត្រូវ​សំរេច​នៅ​ដំណាច់​រដូវ​កាល​នេះ​។ ​​ដោយឡែក​មួយគូ​ទៀត​យប់មិញ​ផងដែរ Manchester City បន្តដំណើរ​ឡើង​វគ្គ ៨ក្រុម​ចុងក្រោយ​ហើយ​ក្រោយ​ស្មើ ០-០ ទល់នឹង​ក្រុម​ភ្ញៀវ Sporting Lisbon តែ​យកឈ្នះ​សរុប​ទាំងពីរ​ជើង ៥-០៕

​អត្ថបទ​៖​នាង សុភា​វុ​ធ