លោក Tom Barrack បេសកជនពិសេសសហរដ្ឋអាមេរិកប្រចាំប្រទេសស៊ីរី បាននិយាយថា កិច្ចខិតខំប្រឹងប្រែង ដើម្បីបន្ធូរបន្ថយស្ថានការណ៍ កំពុងបន្ត ចំពេលមានភាពតានតឹងកើនឡើងរវាងកងកម្លាំងប្រជាធិបតេយ្យស៊ីរី (SDF) និងរដ្ឋាភិបាលស៊ីរី។

នៅក្នុងការបង្ហោះមួយនៅលើប្រព័ន្ធផ្សព្វផ្សាយសង្គម Xនៅថ្ងៃសុក្រនេះ លោក Barrack បានបញ្ជាក់ថា សហរដ្ឋអាមេរិក “នៅតែទាក់ទងយ៉ាងជិតស្និទ្ធជាមួយគ្រប់ភាគីទាំងអស់ នៅក្នុងប្រទេសស៊ីរី ហើយកំពុងធ្វើការទំាងថ្ងៃទាំងយប់ ដើម្បីបន្ធូរបន្ថយស្ថានការណ៍ និងទប់ស្កាត់ការកើនឡើងភាពតានតឹងបន្ថែម  ទៀត»។

ការអត្ថាធិប្បាយទាំងនេះ បានកើតឡើង ខណៈដែលភាគីទាំងពីរ បានចោទប្រកាន់គ្នាទៅវិញទៅមកជុំវិញ ការបរាជ័យក្នុងការអនុវត្តកិច្ចព្រមព្រៀងថ្ងៃទី ១០ ខែមីនា។

លោក Barrack ក៏បានចង្អុលបង្ហាញផងដែរថា ទីក្រុងវ៉ាស៊ីនតោន កំពុងស្វែងរកការបន្តការចរចារវាងរដ្ឋាភិបាលស៊ីរី និងកងកម្លាំងប្រជាធិបតេយ្យស៊ីរី ( SDF) បន្ទាប់ពីមានការប៉ះទង្គិចគ្នារវាង SDF និងកងទ័ពស៊ីរី ដែលបានបណ្តាលឲ្យមនុស្សយ៉ាងតិច ២៤ នាក់ស្លាប់ និងជាង ១០០ នាក់ រងរបួស។

លោក Ilham Ahmed ដែលជាមន្ត្រីឃើដនៅក្នុងរដ្ឋបាលស្វយ័ត បាននិយាយកាលពីថ្ងៃព្រហស្បតិ៍ថា ការអះអាងរបស់រដ្ឋាភិបាលថា កិច្ចព្រមព្រៀងនេះ មិនត្រូវបានអនុវត្ត គឺ «មិនត្រឹមត្រូវ»ទេ ដោយបន្ថែមថា «សហគមន៍អន្តរជាតិ ដឹងរឿងនេះយ៉ាងច្បាស់»៕