ទីភ្នាក់ងារគ្រាអាសន្នរបស់ប្រទេសអូស្ត្រាលី នៅថ្ងៃសុក្រ (ទី១៦ ខែមករា ឆ្នាំ២០២៦) នេះ បានប្រាប់ប្រជាជនឲ្យត្រៀមខ្លួន សម្រាប់ការមានភ្លៀងធ្លាក់ខ្លាំងភ្លាមៗ និងចំហេះព្រៃដ៏គ្រោះថ្នាក់ នៅភាគខាងកើតនៃប្រទេស បន្ទាប់ពីទឹកជំនន់គំហុកភ្លាមៗ បានហូរនាំយករថយន្តចូលសមុទ្រ។

ភ្លៀងធ្លាក់ខ្លាំង កាលពីថ្ងៃព្រហស្បតិ៍ បានបណ្តាលឲ្យមានទឹកជំនន់ហូរកាត់តំបន់មួយចំនួននៃរដ្ឋ Victoria ភាគខាងកើត ដែលនៅតែកំពុងទប់ទល់នឹងចំហេះព្រៃធំៗចំនួន ១០។ រូបភាពជារូបថត និងវីដេអូ នៅក្នុងប្រព័ន្ធផ្សព្វផ្សាយក្នុងស្រុក បានបង្ហាញឲ្យឃើញរថយន្ត ១គ្រឿងលិចអណ្ដែតៗនៅក្នុងទឹកល្អក់ ខណៈដែលវាត្រូវបានហូរនាំយកទៅតាមបណ្ដោយទន្លេ Wye River នៅភាគនិរតីនៃទីក្រុង Melbourne។

ចំណែករថយន្ត ២គ្រឿងទៀត ត្រូវបានឃើញនៅតែលិចផ្នែកខ្លះដោយរលកទឹកសមុទ្រ នាថ្ងៃសុក្រនេះ ដោយមានចម្ងាយ ២-៣ជំហានពីឆ្នេរខ្សាច់។ សេវាឧតុនិយមរដ្ឋ បានឲ្យដឹងថា កម្រិតទឹកច្រើនបំផុត នៅមូលដ្ឋាន ១៨៦មីលីម៉ែត្រ បានធ្លាក់នៅតំបន់មួយ ក្នុងរយៈពេល ២៤ម៉ោង ដល់ត្រឹមព្រឹកថ្ងៃសុក្រនេះ។

ស្នងការគ្រប់គ្រងគ្រោះអាសន្ន លោក Tim Wiebusch បានប្រាប់អ្នកសារព័ត៌មានថា៖ «យើងបានឃើញរលកកម្ដៅក្ដៅខ្លាំងឡើងៗ ចំហេះព្រៃដ៏មហន្តរាយ ហើយឥឡូវនេះ ទឹកជំនន់ដ៏ធំយ៉ាងគំហុកភ្លាមៗ នៅភាគនិរតីនៃរដ្ឋនេះ។ វាពិតជាចាំបាច់ណាស់ ក្នុងការរំលឹកឲ្យទាន់ពេលវេលា ដែលថា សហគមន៍ត្រូវត្រៀមខ្លួនសម្រាប់គ្រោះអាសន្នគ្រប់ប្រភេទ»។

មន្ត្រីបានឲ្យដឹងថា ទឹកជំនន់គំហុកភ្លាមៗនេះ បានកាត់ផ្តាច់ផ្លូវ Great Ocean Road របស់រដ្ឋនេះ ហើយបានបង្ខំឲ្យមនុស្សរហូតដល់ ៣០០នាក់ចាកចេញ ហើយបានបញ្ជាក់ថា ពួកគេភាគច្រើន កំពុងវិស្សមកាលនៅជំរំរថយន្ត។ មន្ត្រីបានបន្ថែមថា កុមារម្នាក់បានរងរបួស ហើយត្រូវបានដឹកតាមយន្តហោះទៅកាន់មន្ទីរពេទ្យ៕