ការិយាល័យស្ថិតិ Eurostat របស់អឺរ៉ុប កាលពីថ្ងៃព្រហស្បតិ៍ (ទី១៥ ខែមករា ឆ្នាំ២០២៦) បានឲ្យដឹងថា តំបន់ចាយប្រាក់អឺរ៉ូ បានមានអតិរេកពាណិជ្ជកម្មបរទេសចំនួន ៩,៩ពាន់លានអឺរ៉ូ (១១,៥ ពាន់លានដុល្លារ) នៅក្នុងខែវិច្ឆិកាឆ្នាំមុន។

ទិន្នន័យនោះបានបង្ហាញថា តួលេខនេះបានធ្លាក់ចុះ ៥,៥ពាន់លានអឺរ៉ូ បើធៀបនឹងខែមុននោះ។ ទីផ្សារបានរំពឹងថា អតិរេកនឹងមានចំនួន ១៤,៨ពាន់លានអឺរ៉ូ នាខែវិច្ឆិកានោះ។ ការនាំចេញរបស់តំបន់ចាយប្រាក់អឺរ៉ូទៅកាន់ពិភពលោក បានធ្លាក់ចុះ ៣,៤ភាគរយ បើធៀបនឹងឆ្នាំមុន នៅក្នុងខែវិច្ឆិកា ដោយថយចុះមកត្រឹម ២៤០,២ពាន់លានអឺរ៉ូ ខណៈដែលការនាំចូលបានធ្លាក់ចុះ ១,៣ភាគរយ ពោលគឺមកត្រឹម ២៣០,៣ពាន់លានអឺរ៉ូ។

ទន្ទឹមនឹងនេះ សហភាពអឺរ៉ុប(EU) បានមានអតិរេកពាណិជ្ជកម្មបរទេសចំនួន ៨,១ពាន់លានអឺរ៉ូ នៅក្នុងខែវិច្ឆិកាឆ្នាំមុន។ សហរដ្ឋអាមេរិកនៅតែជាទីតាំងនាំចេញច្រើនជាងគេបំផុតរបស់ EU ដោយមានទំហំ ៣៧,៤ពាន់លានអឺរ៉ូ ដោយធ្លាក់ចុះ ២០,៣ភាគរយ បើធៀបរយៈពេលដូចគ្នានៃឆ្នាំមុន។

ហើយសម្រាប់ការនាំចេញរបស់ EU ទៅកាន់ប្រទេសចិន ទំហំបានធ្លាក់ចុះ ១,២ភាគរយ ធៀបនឹងរយៈពេលដូចគ្នានៅឆ្នាំមុន ដោយថយមកនៅត្រឹម ១៦,៤ពាន់លានអឺរ៉ូ ហើយការនាំចេញទៅកាន់ចក្រភពអង់គ្លេស បានធ្លាក់ចុះ ៦ភាគរយ ពោលគឺមកនៅត្រឹម ២៨,៤ពាន់លានអឺរ៉ូ។

ចិន គឺជាប្រទេសនាំចូលធំជាងគេទៅកាន់ EU ក្នុងខែវិច្ឆិកាឆ្នាំមុន ដោយមានទំហំ ៤៨,៧ពាន់លានអឺរ៉ូ ពោលគឺកើនឡើង ៣,៨ភាគរយ ធៀបនឹងឆ្នាំមុន ខណៈដែលការនាំចូលពីសហរដ្ឋអាមេរិក បានធ្លាក់ចុះ ៧,១ភាគរយ ដោយមកនៅត្រឹមតែ ២៦,៧ពាន់លានអឺរ៉ូ៕