ការវាយប្រហាររបស់អ៊ីស្រាអែល បានសម្លាប់ពលរដ្ឋប៉ាឡេស្ទីនច្រើននាក់នៅតំបន់ហ្កាហ្សា ដែលជាការរំលោភបំពានចុងក្រោយនៃបទឈប់បាញ់ដ៏ផុយស្រួយរបស់ខ្លួនជាមួយក្រុមហាម៉ាស មួយថ្ងៃបន្ទាប់ពីសហរដ្ឋអាមេរិកបានប្រកាសពីការចាប់ផ្តើមដំណាក់កាលទីពីរនៃផែនការរបស់លោកប្រធានាធិបតី Donald Trump ដើម្បីបញ្ចប់សង្គ្រាមប្រល័យពូជសាសន៍របស់អ៊ីស្រាអែលប្រឆាំងពលរដ្ឋប៉ាឡេស្ទីននៅក្នុងដែនដីដែលត្រូវបានហ៊ុមព័ទ្ធ។ ក្មេងស្រីអាយុ១០ឆ្នាំម្នាក់ ក្មេងប្រុសអាយុ១៦ឆ្នាំ និងស្ត្រីចំណាស់ម្នាក់បានស្លាប់ក្នុងការវាយប្រហាររបស់អ៊ីស្រាអែលកាលពីថ្ងៃសុក្រ ខណៈសមាជិកគណៈកម្មាធិការជំនាញប៉ាឡេស្ទីន នឹងអង្គុយពិភាក្សាជាលើកដំបូងនៅទីក្រុងគែរ ដើម្បីត្រៀមសម្រាប់ការដាក់ចេញដំណាក់កាលទីពីរនៃផែនការសន្តិភាព។ ទីភ្នាក់ងារសារព័ត៌មានប៉ាឡេស្ទីន Wafa បានរាយការណ៍ថា កងកម្លាំងអ៊ីស្រាអែលបានបាញ់សម្លាប់ក្មេងប្រុសអាយុ១៦ឆ្នាំនៅតំបន់ Beit Lahiya ភាគខាងជើងតំបន់ហ្កាហ្សា។ ទីភ្នាក់ងារនេះបាននិយាយថា ក្មេងប្រុសនោះបានស្លាប់ភ្លាមៗ បន្ទាប់ពីត្រូវបានបាញ់ចំក្បាលដោយកងកម្លាំងអ៊ីស្រាអែល។ ទីភ្នាក់ងារនេះបានរាយការណ៍ពីការស្លាប់របស់ស្រ្តីអាយុ៦២ឆ្នាំម្នាក់ ដែលត្រូវបានសម្លាប់ដោយកងទ័ពបាញ់ចេញពីយានយន្តយោធានៅភាគខាងលិចទីក្រុង Khan Younis ខណៈកងទ័ពបានធ្វើប្រតិបត្តិការវាយកម្ទេចយ៉ាងទូលំទូលាយនៅភាគខាងត្បូងទីក្រុងនោះ។ ព័ត៌មាន Al Jazeera និយាយថា ក្មេងស្រីអាយុ១០ឆ្នាំត្រូវបានវាយប្រហារដោយគ្រាប់បែកទម្លាក់ដោយយានដ្រូនរបស់អ៊ីស្រាអែលនៅតំបន់ Beit Lahiya ដោយបានស្លាប់ភ្លាមៗបន្ទាប់ពីទៅដល់មន្ទីរពេទ្យ al-Shifa ក្នុងស្ថានភាពធ្ងន់ធ្ងរ។ ក្នុងរយៈពេល២៤ម៉ោងកន្លងទៅនេះ យ៉ាងហោចណាស់ជនជាតិប៉ាឡេស្ទីន១៥នាក់ត្រូវបានសម្លាប់ ដែលក្នុងនោះ៦នាក់នៅក្នុងការទម្លាក់គ្រាប់បែកលើលំនៅឋានពីរខ្នងក្នុងទីក្រុង Deir el-Balah ភាគកណ្តាល។ អ៊ីស្រាអែលបានប្រកាសថា ខ្លួនបានសម្លាប់លោក Muhammad al-Hawli មេបញ្ជាការនៅក្នុងកងពលតូច Qassam ជាក្រុមប្រដាប់អាវុធរបស់ក្រុមហាម៉ាស និងបាននិយាយថា ខ្លួនបានវាយប្រហារ «ភេរវករជាច្រើននាក់នៅទូទាំងតំបន់ហ្គាហ្សា»។