សមាជិកនៃសហគមន៍អ៊ីរ៉ង់-អាមេរិក កាលពីថ្ងៃសុក្រ ទី១៦ ខែមករា បានធ្វើពិធីរំលឹកវិញ្ញាណក្ខន្ធនៅជិតសេតវិមាន ដើម្បីរំលឹកដល់ពលរដ្ឋអ៊ីរ៉ង់ដែលត្រូវបានសម្លាប់នៅក្នុងការបះបោរកាលពីពេលថ្មីៗនេះ ដែលគេជឿថាមានចំនួនរាប់ពាន់នាក់ ហើយបានថ្កោលទោសរបបដែលកំពុងគ្រប់គ្រងមួយនេះ ដោយអំពាវនាវឱ្យមានសេរីភាពនៅក្នុងប្រទេសអ៊ីរ៉ង់។

លោក Ramesh Sepehrrad ប្រធានទីប្រឹក្សាសម្រាប់អង្គការសហគមន៍អ៊ីរ៉ង់-អាមេរិក បាននិយាយថា «សារនៅទីនេះគឺរក្សាសម្ពាធលើអ៊ីរ៉ង់ ហើយអ្វីដែលសំខាន់នោះគឺថា ខណៈពិធីរំលឹកវិញ្ញាណក្ខន្ធនៅពេលនេះកំពុងអំពាវនាវឱ្យអ្នកទោសនយោបាយទាំងអស់ត្រូវដោះលែង»។

អ្នកស្រុកបាននិយាយកាលពីថ្ងៃសុក្រថា ការបង្ក្រាបដ៏បង្ហូរឈាមរបស់អ៊ីរ៉ង់ទំនងជាបានបង្ក្រាបការតវ៉ាយ៉ាងទូលំទូលាយសម្រាប់ពេលនេះ ខណៈប្រព័ន្ធផ្សព្វផ្សាយរដ្ឋបានរាយការណ៍ពីការចាប់ខ្លួនមនុស្សបន្ថែមទៀតនៅក្នុងស្រមោលនៃការគំរាមកំហែងដដែលៗរបស់សហរដ្ឋអាមេរិកក្នុងការធ្វើអន្តរាគមន៍ប្រសិនបើការសម្លាប់នៅតែបន្ត។ ប្រធានាធិបតីសហរដ្ឋអាមេរិក លោក Donald Trump បានគំរាមដដែលៗក្នុងការធ្វើអន្តរាគមន៍ រួមមានការសន្យាថានឹង «មានចំណាត់ការយ៉ាងខ្លាំងក្លា» ប្រសិនបើអ៊ីរ៉ង់ប្រហារជីវិតអ្នកតវ៉ា ដែលមេដឹកនាំរបស់ទីក្រុងតេអេរ៉ង់និយាយថា បានលុបចោលការព្យួរ ក មនុស្សជាច្រើន។

ការតវ៉ាបានផ្ទុះឡើងកាលពីថ្ងៃទី២៨ ខែធ្នូ ដោយសារតែការលំបាកផ្នែកសេដ្ឋកិច្ច ហើយបានរាលដាលទៅជាបាតុកម្មយ៉ាងធំឈានដល់អំពើហិង្សាកាលពីចុងសប្តាហ៍មុន។ យោងតាមក្រុមប្រឆាំង និងមន្ត្រីអ៊ីរ៉ង់ម្នាក់បាននិយាយ មនុស្សជាង២.០០០នាក់ត្រូវបានសម្លាប់ នៅក្នុងភាពវឹកវរក្នុងស្រុកដ៏អាក្រក់បំផុតចាប់តាំងពីបដិវត្តន៍អ៊ីស្លាមឆ្នាំ១៩៧៩ របស់អ៊ីរ៉ង់។