រដ្ឋមន្ត្រីក្រសួងមហាផ្ទៃ លោក Ali Yerlikaya បាននិយាយកាលពីថ្ងៃសុក្រថា អាជ្ញាធរទួរគី បានឃាត់ខ្លួនជនសង្ស័យរត់ពន្ធមនុស្ស ១៥៥នាក់ ក្នុងប្រតិបត្តិការសម្របសម្រួលនៅទូទាំងខេត្តចំនួន ១៥ ក្នុងរយៈពេលពីរសប្តាហ៍កន្លងមកនេះ។  

នៅក្នុងសេចក្តីថ្លែងការណ៍មួយនៅលើវេទិកាប្រព័ន្ធផ្សព្វផ្សាយសង្គម X លោក Yerlikaya បានបញ្ជាក់ថា ការបង្ក្រាបនេះ ដែលមានការគាំទ្រពីកងកម្លាំងជើងគោក និងយានដ្រូន បានកំណត់គោលដៅទៅលើផ្លូវជួញដូរពីទីក្រុងធំៗ ទៅកាន់តំបន់ឆ្នេរសមុទ្រ។

លោកបានបន្ថែមថា ជនសង្ស័យចំនួន ៥០នាក់ ត្រូវបានចាប់ខ្លួន និងដាក់ពន្ធនាគារ ខណៈដែល ២៧នាក់ ត្រូវបានដាក់ឲ្យស្ថិតនៅក្រោមការត្រួតពិនិត្យរបស់តុលាការ។ នីតិវិធីផ្លូវច្បាប់កំពុងបន្តសម្រាប់ជនសង្ស័យផ្សេងទៀត។ ក្នុងអំឡុងពេលប្រតិបត្តិការ អាជ្ញាធរក៏បានរឹបអូសយានយន្តចំនួន ៨១គ្រឿង និងទូកចំនួន ៦គ្រឿង ដែលប្រើប្រាស់ក្នុងការរត់ពន្ធជនអន្តោប្រវេសន៍ផងដែរ។

លោក Yerlikaya បាននិយាយថា ទួរគីបានពង្រឹងសន្តិសុខព្រំដែនរបស់ខ្លួនជាមួយនឹងប្រព័ន្ធត្រួតពិនិត្យ និងគ្រប់គ្រងកម្រិតខ្ពស់ និងបានចាត់វិធានការជាក់ស្តែង និងផ្លូវច្បាប់ប្រឆាំងនឹងបណ្តាញរត់ពន្ធ៕