ផ្សែងអ័ព្ទក្រាស់បានគ្របដណ្តប់លើទីក្រុងដែលី និងតំបន់ជាយក្រុងរបស់ខ្លួន នៅថ្ងៃសៅរ៍ (ទី១៧ ខែមករា) នេះ ខណៈដែលទីក្រុងនេះ កំពុងស្ថិតនៅក្រោមលក្ខខណ្ឌអាកាសធាតុត្រជាក់ និងការបំពុលបរិយាកាសកើនឡើង។

សីតុណ្ហភាពនៅក្នុងទីក្រុងនេះ ត្រូវបានកត់ត្រានៅ ៤,៣ អង្សាសេ នៅពេលព្រឹកព្រលឹមថ្ងៃសៅរ៍នេះ ដោយផ្សែងអ័ព្ទខ្លាំង បានកាត់បន្ថយការមើលឃើញ។

ទន្ទឹមនឹងនេះ ការបំពុលខ្យល់នៅតែមិនថយចុះ ដោយកម្រិតគុណភាពខ្យល់ ត្រូវបានកត់ត្រាខ្ពស់ដល់ ៤៥១ ដែលជាប្រភេទធ្ងន់ធ្ងរ។ នេះបើយោងតាមក្រុមប្រឹក្សាត្រួតពិនិត្យការបំពុលបរិយាកាសកណ្តាលរបស់ប្រទេសឥណ្ឌា។ 

ការបំពុលបរិយាកាស គឺជាបញ្ហារដូវរងាប្រចាំឆ្នាំ នៅក្នុងទីក្រុងដែលី និងតំបន់ជាយក្រុងរបស់ខ្លួន នៅពេលដែលខ្យល់ត្រជាក់ និងក្រាស់បានទប់ស្កាត់ការបំភាយឧស្ម័នពីយានយន្ត ការដ្ឋានសំណង់ និងការដុតព្រៃដើម្បីដាំដំណាំ នៅក្នុងរដ្ឋជិតខាង ដែលជំរុញឲ្យកម្រិតបំពុលឡើងដល់កម្រិតខ្ពស់បំផុតមួយ ក្នុងពិភពលោក និងធ្វើឲ្យប្រជាជនប្រឈមនឹងហានិភ័យផ្លូវដង្ហើមធ្ងន់ធ្ងរ។

ការិយាល័យអាកាសធាតុបាននិយាយថា ប្រទេសឥណ្ឌាត្រូវបានគេរំពឹងថា នឹងឃើញសីតុណ្ហភាពអតិបរមា និងអប្បបរមាទាបជាងមធ្យម នៅក្នុងខែមករានេះ៕