ការគំរាមកំហែងរបស់លោកប្រធានាធិបតី Donald Trump ក្នុងការដាក់ពន្ធថ្មីលើសម្ព័ន្ធមិត្តចំនួន៨ប្រទេស ប្រឆាំងនឹងការដណ្តើមយកកោះ Greenland ដែលលោកបានស្នើឡើង បានទាក់ទាញការថ្កោលទោសពីក្រុមមេដឹកនាំអឺរ៉ុប។

លោក Keir Starmer នាយករដ្ឋមន្ត្រីចក្រភពអង់គ្លេស បាននិយាយថា ចំណាត់ការនេះគឺខុសទាំងស្រុង ខណៈប្រធានាធិបតីបារាំង Emmanuel Macron បានហៅថាមិនអាចទទួលយកបាន។

ការអត្ថាធិប្បាយទាំងនេះបានកើតឡើងបន្ទាប់ពីលោក Trump បានប្រកាសថា ការដំឡើងពន្ធ១០% លើទំនិញពីប្រទេសដាណឺម៉ាក ន័រវេស ស៊ុយអែត បារាំង អាល្លឺម៉ង់ ចក្រភពអង់គ្លេស ហូឡង់ និងហ្វាំងឡង់ នឹងចូលជាធរមាននៅថ្ងៃទី ១ កុម្ភៈ ប៉ុន្តែក្រោយមកអាចកើនឡើងដល់២៥% ហើយនឹងបន្តរហូតដល់កិច្ចព្រមព្រៀងមួយត្រូវបានសម្រេច។

លោក Trump ទទូចថា ទឹកដីស្វយ័តរបស់ប្រទេសដាណឺម៉ាកមួយនេះ គឺមានសារៈសំខាន់សម្រាប់សន្តិសុខរបស់សហរដ្ឋអាមេរិក ហើយពុំបានច្រានចោលការដណ្តើមយកដែនដីនេះដោយកម្លាំងនោះទេ។

ទន្ទឹមនឹងនេះ មនុស្សរាប់ពាន់នាក់បានចេញដើរក្បួនតាមដងផ្លូវនៅកោះ Greenland និងក្នុងប្រទេសដាណឺម៉ាកកាលពីថ្ងៃសៅរ៍ ដើម្បីតវ៉ាប្រឆាំងនឹងការដណ្តើមយកដែនដី Greenland ដែលបានស្នើឡើងដោយសហរដ្ឋអាមេរិក៕