លោកប្រធានាធិបតី Donald Trump កាលពីថ្ងៃសៅរ៍ បានអំពាវនាវឱ្យបញ្ចប់រជ្ជកាលរយៈពេល ៣៧ឆ្នាំរបស់មេដឹកនាំកំពូលអ៊ីរ៉ង់ លោក Ayatollah Ali Khamenei ។  

លោក Trump បានប្រាប់សារព័ត៌មាន POLITICO ថា ដល់ពេលស្វែងរកមេដឹកនាំថ្មីនៅក្នុងប្រទេសអ៊ីរ៉ង់ហើយ ខណៈការតវ៉ាយ៉ាងទូលំទូលាយ អំពាវនាវឱ្យបញ្ចប់របបនេះហាក់ដូចជាបានថយចុះ។

អ្នកតវ៉ារាប់ពាន់នាក់នៅទូទាំងប្រទេសត្រូវបានសម្លាប់ក្នុងរយៈពេលបីសប្តាហ៍ចុងក្រោយនេះ ដែលជំរុញឱ្យលោក Trump គំរាមកំហែងម្តងហើយម្តងទៀតអំពីអន្តរាគមន៍យោធា។ កាលពីថ្ងៃអង្គារ លោក Trump បានអំពាវនាវឱ្យប្រជាជនអ៊ីរ៉ង់បន្តតវ៉ា និងកាន់កាប់ស្ថាប័ន ដោយនិយាយថា ជំនួយកំពុងមកដល់ហើយ។  

នៅថ្ងៃបន្ទាប់ លោកប្រធានាធិបតី បានផ្លាស់ប្តូរទិសដៅភ្លាមៗ ដោយនិយាយថា លោកត្រូវបានគេជូនដំណឹងថា ការសម្លាប់បានឈប់ហើយ។

លោក Trump បាននិយាយកាលពីថ្ងៃសៅរ៍ នៅពេលសួរអំពីទំហំនៃប្រតិបត្តិការយោធារបស់សហរដ្ឋអាមេរិកដែលអាចកើតមាននៅក្នុងប្រទេសអ៊ីរ៉ង់ថា ការសម្រេចចិត្តដ៏ល្អបំផុតដែលលោកបានធ្វើគឺ អ៊ីរ៉ង់ពុំបានព្យួរកមនុស្សជាង៨០០ នាក់កាលពីពីរថ្ងៃមុននោះទេ។  

ការអត្ថាធិប្បាយរបស់លោក Trump មានឡើង ភ្លាមៗក្រោយលោក Khamenei បង្ហោះសារអរិភាពជាបន្តបន្ទាប់ដោយចោទប្រធានាធិបតីអាមេរិកថានៅពីក្រោយការតវ៉ាដ៏ហិង្សា និងភាពចលាចលនៅក្នុងប្រទេសអ៊ីរ៉ង់៕