ខណៈភាពតានតឹងនៅតែខ្ពស់បន្ទាប់ពីការសម្លាប់ស្ត្រីឈ្មោះ Renee Good ដោយភ្នាក់ងារសហព័ន្ធក្រុមបាតុករប្រឆាំងការអនុវត្តន៍ច្បាប់អន្តោប្រវេសន៍ (ICE) កាលពីថ្ងៃសៅរ៍បានប៉ះទង្គិចជាមួយក្រុមបាតុករនៅកណ្តាលទីក្រុង Minneapolis រដ្ឋ Minnesota ក្នុងការជួបជុំមួយរៀបចំដោយសកម្មជនអនឡាញម្នាក់ដែលបានចូលរួមក្នុងការវាយប្រហារកាលពីថ្ងៃទី៦មករាឆ្នាំ២០២១ លើវិមានកាពីតូលសហរដ្ឋអាមេរិក។   

ក្រុមមន្ត្រីបាននិយាយថា ការតវ៉ាវាយបកដែលរៀបចំដោយសម្ព័ន្ធសកម្មភាពប្រជាជនប្រឆាំងនឹងលោក Trump បាននាំឱ្យអាជ្ញាធររដ្ឋដាក់កងឆ្មាំជាតិ Minneapolis ឱ្យស្ថិតក្នុងការប្រុងប្រយ័ត្នដើម្បីឆ្លើយតបប្រសិនបើចាំបាច់។ នគរបាលក្រុង Minneapolis បានធ្វើដំណើរតាមរថយន្តក្រុង និងរថពាសដែកទៅកាន់កណ្តាលទីក្រុង ជាកន្លែងដែលការតវ៉ាបានចាប់ផ្តើមនៅម៉ោងប្រហែល ១ រសៀល ម៉ោងក្នុងស្រុក។

លោក Jake Lang ជាមនុស្សម្នាក់ក្នុងចំណោមមនុស្សជាង១.៥០០នាក់ ដែលត្រូវបានលើកលែងទោសដោយប្រធានាធិបតី Donald Trump បន្ទាប់ពីការកាត់ទោសព្រហ្មទណ្ឌរបស់ពួកគេទាក់ទងនឹងព្រឹត្តិការណ៍ថ្ងៃទី ៦ ខែមករា បាននិយាយថា ការដង្ហែក្បួនប្រឆាំងនឹងការក្លែងបន្លំ នឹងចាប់ផ្តើមនៅសាលាក្រុង Minneapolis ជាទីដែលរូបលោកបានសន្យាថានឹងដុតច្បាប់ចម្លងនៃគម្ពីរកូរ៉ាន (Koran) និងដឹកនាំមនុស្សដើរក្បួនប្រហែលពីរម៉ាយទៅកាន់សង្កាត់ Cedar Riverside នៃទីក្រុង Minneapolis ជាកន្លែងដែលជនអន្តោប្រវេសន៍សូម៉ាលីជាច្រើនរស់នៅ។

នៅខាងក្រៅសាលាក្រុង Minneapolis ក្រុមបាតុករប្រឆាំងនឹងការអនុវត្តន៍ច្បាប់អន្តោប្រវេសន៍ អាចត្រូវគេមើលឃើញថាបានទាញបដាដែលក្រុមរបស់លោក Lang បានដាក់តាំងបង្ហាញដែលមានសរសេរថា «ជនជាតិអាមេរិកប្រឆាំងនឹងសាសនាអ៊ីស្លាម» ហើយការប៉ះទង្គិចគ្នាអាចត្រូវបានគេមើលឃើញក្នុងវីដេអូពីលើអាកាសពីសាខាប្រព័ន្ធផ្សព្វផ្សាយទូរទស្សន៍ ABC ក្នុងស្រុក៕