មន្ត្រីជួយសង្គ្រោះបាននិយាយថា អគ្គិភ័យដ៏ធំមួយបានឆាបឆេះផ្សារទំនើបកម្ពស់ច្រើនជាន់មួយកន្លែងនៅក្នុងទីក្រុងកំពង់ផែការ៉ាជីភាគខាងត្បូងប្រទេសប៉ាគីស្ថាន កាលពីយប់ថ្ងៃសៅរ៍ និងបានសម្លាប់មនុស្សយ៉ាងហោចណាស់៥នាក់។

យោងតាមអ្នកនាំពាក្យរបស់អង្គភាពជួយសង្គ្រោះ ១១២២ ក្រុមអ្នកពន្លត់អគ្គិភ័យ និងអ្នកជួយសង្គ្រោះបានប្រញាប់ប្រញាល់ទៅកាន់ផ្សារទំនើប Gul Plaza ក្នុងសង្កាត់ពាណិជ្ជកម្ម Saddar នៃទីក្រុងការ៉ាជី បន្ទាប់ពីទទួលបានព័ត៌មានអំពីអគ្គិភ័យនៅម៉ោងប្រហែល១០ យប់។

វីដេអូទូរទស្សន៍បង្ហាញពីក្រុមមន្ត្រីពន្លត់អគ្គិភ័យ កំពុងព្យាយាមពន្លត់អណ្តាតភ្លើង ខណៈរថយន្តពន្លត់អគ្គិភ័យជាច្រើនគ្រឿងបានប្រើជណ្ដើរ កាណុងទឹក និងទុយោដើម្បីពន្លត់ជាន់នានារបស់អគារ ជាកន្លែងដែលអណ្តាតភ្លើងបានឆាបឆេះរាលដាលចេញពីបង្អួច និងយ៉រនៃអគារ។

យ៉ាងណា មូលហេតុនាំឲ្យមានគ្រោះអគ្គិភ័យនេះ នៅមិនទាន់ត្រូវបានគេដឹងភ្លាមៗនៅឡើយទេ។

មនុស្សជាង២០នាក់បានរងរបួសក្នុងអគ្គិភ័យនេះ ហើយចំនួនអ្នកស្លាប់បានកើនឡើងដល់៥នាក់ ។ 

នគរបាលបាននិយាយថា ការស៊ើបអង្កេតមួយនឹងត្រូវធ្វើឡើងនៅពេលការពន្លត់អណ្ដាតភ្លើងរួចរាល់ហើយនោះ៕