ក្រុមអ្នកជួយសង្គ្រោះឥណ្ឌូនេស៊ីបានរកឃើញបំណែកយន្តហោះបាត់ខ្លួន ដែលត្រូវគេជឿថាបានធ្លាក់ជាមួយមនុស្ស ១១ នាក់នៅលើយន្តហោះ ខណៈកំពុងធ្វើដំណើរទៅកាន់តំបន់ភ្នំមួយនៅលើកោះ Sulawesi ក្នុងអំឡុងពេលមានពពកក្រាស់។ 

ការរកឃើញនៅថ្ងៃអាទិត្យនេះ បានកើតឡើងបន្ទាប់ពីយន្តហោះខ្នាតតូចមួយគ្រឿង កំពុងធ្វើដំណើរពីទីក្រុង Yogyakarta នៅលើកោះ ជ្វា ដ៏សំខាន់របស់ប្រទេសឥណ្ឌូនេស៊ី ទៅកាន់ ទីក្រុង Makassar ដែលជារដ្ឋធានីនៃខេត្ត Sulawesi ខាងត្បូង បានបាត់ពីរ៉ាដាកាលពីថ្ងៃសៅរ៍។

លោក Muhammad Arif Anwar ដែលជាប្រធានការិយាល័យស្វែងរក និងជួយសង្គ្រោះរបស់ទីក្រុងMakassar បាននិយាយថា ក្រុមជួយសង្គ្រោះនៅលើឧទ្ធម្ភាគចក្រកងទ័ពអាកាសនៅព្រឹកថ្ងៃអាទិត្យ នេះបានប្រទះឃើញអ្វីដែលទំនងជាបង្អួចយន្តហោះខ្នាតតូចមួយក្នុងតំបន់ព្រៃឈើមួយនៅលើជម្រាលភ្នំ Bulusaraung។

លោក Anwar បានប្រាប់សន្និសីទសារព័ត៌មានមួយថា បន្ទាប់មកក្រុមអ្នកជួយសង្គ្រោះនៅលើដីបានទាញយកបំណែកធំៗស្របនឹងតួយន្តហោះ និងកន្ទុយ ដែលរាយប៉ាយនៅលើជម្រាលដ៏ចោតនៅភាគខាងជើង។ 

លោក Anwar បាននិយាយថា ការរកឃើញផ្នែកសំខាន់ៗរបស់យន្តហោះធ្វើឱ្យតំបន់ស្វែងរករួមតូចយ៉ាងខ្លាំង និងផ្តល់នូវតម្រុយដ៏សំខាន់មួយសម្រាប់ការរឹតបន្តឹងតំបន់ស្វែងរក។ ក្រុមស្វែងរក និងជួយសង្គ្រោះចម្រុះរបស់លោកឥឡូវនេះកំពុងផ្តោតលើការស្វែងរកជនរងគ្រោះ ជាពិសេសអ្នកដែលអាចនៅរស់រានមានជីវិត៕