លោក Scott Bessent រដ្ឋមន្ត្រីក្រសួងរតនាគារអាមេរិក កាលពីថ្ងៃអាទិត្យ (១៨ មករា) បានរិះគន់ខ្លាំងៗលើសម្ព័ន្ធមិត្តរបស់ទីក្រុងវ៉ាស៊ីនតោនថា «ភាពទន់ខ្សោយ» របស់អឺរ៉ុប ផ្ដល់ភាពចាំបាច់ដល់សហរដ្ឋអាមេរិក ត្រូវតែគ្រប់គ្រងកោះហ្រ្គីនលែន (Greenland) ដើម្បីស្ថិរភាពសកល ទោះបីជាសមាជិកសភាអាមេរិកមួយចំនួន សម្តែងក្ដីបារម្ភពីកិច្ចប្រឹងប្រែងរបស់រដ្ឋបាលលោកប្រធានាធីបតី Donald Trump ក្នុងការក្រសោបយកទឹកដីតំបន់អាកទិក ដែលកាន់កាប់ដោយដាណឺម៉ាក មួយនេះក៏ដោយ។

ថ្លែងក្នុងកម្មវិធីមួយរបស់ទូរទស្សន៍ NBC លោក Bessent បានលើកឡើងថា កម្មសិទ្ធិលើដែនដីហ្រ្គីនលែន គឺមានសារៈសំខាន់ខ្លាំងណាស់ក្នុង «ការប្រកួតអុកភូមិសាស្ត្រនយោបាយ» ជាមួយរុស្ស៊ី និងចិន។ ការអត្ថាធិប្បាយនេះធ្វើឡើងត្រឹមតែមួយថ្ងៃប៉ុណ្ណោះ បន្ទាប់ពីលោក Trump ប្ដេជ្ញាថា នឹងអនុវត្តពន្ធគយលើបណ្ដាសមាជិកប្លុកអឺរ៉ុប ដែលប្រឆាំងនឹងបំណងយកកោះហ្រ្គីនលែនរបស់សហរដ្ឋអាមេរិក រួមទាំងដាណឺម៉ាកផងដែរ ដែលជាសម្ព័ន្ធមិត្តដ៏រឹងមាំបំផុតមួយរបស់ទីក្រុងវ៉ាស៊ីនតោន ជាយូរមកហើយ។

លោក Bessent បាននិយាយថា «អាមេរិកគឺជាប្រទេសដ៏រឹងមាំបំផុតនៅលើពិភពលោក។ បណ្ដាប្រទេសអឺរ៉ុប បង្ហាញពីភាពទន់ខ្សោយ ប៉ុន្តែសហរដ្ឋអាមេរិក បង្ហាញពីភាពខ្លាំង»។ ខណៈភាពតានតឹងជាមួយសហភាពអឺរ៉ុប កើនឡើងនៅថ្ងៃអាទិត្យ លោក Bessent បានបង្ហាញជំនឿចិត្តរបស់លោកថា នៅទីបំផុត មេដឹកនាំអឺរ៉ុបច្បាស់ជានឹង «ងាកទៅរក» គំនិតនៃការគ្រប់គ្រងរបស់អាមេរិក លើហ្រ្គីនលែន។

ទាក់ទងនឹងការប្រើប្រាស់កម្លាំងបាយដើម្បីដណ្តើមយកហ្រ្គីនលែន ប្រមុខក្រសួងរតនាគារអាមេរិករូបនេះ បានបញ្ជាក់ថា ថ្មីៗនេះ លោកមិនទាន់បានពិភាក្សាជាមួយលោក Trump នៅឡើយទេ ទៅលើថា តើលោកនៅតែពិចារណាប្រើ «អំណាចអាសន្ន» ដើម្បីផ្ដល់ភាពភាពត្រឹមត្រូវលើរឿងនេះដែរឬយ៉ាងណា។ ព្រឹទ្ធសមាជិកមួយចំនួនបាននិយាយថា ការធ្វើដូច្នេះនឹងក្លាយជារឿង «គួរឱ្យអស់សំណើច» ពីព្រោះពុំមានអាសន្ននៅហ្រ្គីនលែន នោះទេ៕