ប្រធានាធិបតីឈីលី លោក Gabriel Boric បានប្រកាសដាក់តំបន់ចំនួនពីរនៅភាគខាងត្បូងនៃប្រទេស នៅក្នុងស្ថានភាពគ្រោះមហន្តរាយ កាលពីថ្ងៃអាទិត្យ (១៨ មករា) ខណៈចំហេះឆេះព្រៃយ៉ាងសន្ធោរសន្ធៅបានបង្ខំឱ្យមនុស្សយ៉ាងហោចណាស់ ២០.០០០នាក់ត្រូវជម្លៀសខ្លួន និងបានសម្លាប់មនុស្សយ៉ាងហោចណាស់ ១៨នាក់។

យោងតាមទីភ្នាក់ងារព្រៃឈើ CONAF របស់ឈីលី បានឱ្យដឹងថា ក្រុមពន្លត់អគ្គិភ័យកំពុងប្រឹងប្រែងពន្លត់ចំហេះព្រៃសកម្មចំនួន ២៤កន្លែង ទូទាំងប្រទេស គិតត្រឹមព្រឹកថ្ងៃអាទិត្យដដែលនោះ ដោយចំហេះធំបំផុតគឺនៅក្នុងតំបន់ Ñuble និង Bío Bío ជាទីដែលរដ្ឋាភិបាល ប្រកាសគ្រាអាសន្ន។ តំបន់ទាំងនេះមានចម្ងាយប្រហែល ៥០០គីឡូម៉ែត្រ ភាគខាងត្បូងនៃរដ្ឋធានីសាន់ត្យាហ្គោ។

បន្ទាប់ពីកិច្ចប្រជុំជាមួយអភិបាលនៃក្រុងដែលរងផលប៉ះពាល់ លោកប្រធានាធិបតី Boric បានថ្លែងកាលពីល្ងាចថ្ងៃអាទិត្យថា មនុស្សយ៉ាងតិច ១៨នាក់ បានស្លាប់ដោយសារចំហេះដ៏កំណាចនោះ។ អាជ្ញាធរព្រមានថា ស្ថានភាពមិនល្អ ដូចជាខ្យល់បក់ខ្លាំង និងសីតុណ្ហភាពខ្ពស់ បានជួយឱ្យចំហេះព្រៃរាលដាលយ៉ាងគ្រោះថ្នាក់ និងបង្កភាពស្មុគស្មាញដល់ប្រតិបត្តិការរបស់ក្រុមពន្លត់អគ្គិភ័យ។

អាជ្ញាធរនិយាយថា គិតត្រឹមថ្ងៃអាទិត្យ អណ្ដាតភ្លើងបានលេបត្របាក់ផ្ទៃដីជិត ៨.៥០០ហិកតា ក្នុងតំបន់ទាំងពីរនោះ ដោយបង្កគ្រោះថ្នាក់ដល់សហគមន៍ជាច្រើន ដែលនាំឱ្យអាជ្ញាធរប្រកាសបញ្ជាជម្លៀស។ ទីភ្នាក់ងារគ្រោះមហន្តរាយឈីលី បាននិយាយថា មនុស្សប្រមាណ ២ម៉ឺននាក់ ត្រូវបានជម្លៀសទៅទីសុវត្ថិភាព ហើយផ្ទះសម្បែងចំនួន ២៥០ខ្នង ត្រូវបានដុតបំផ្លាញ៕