មេបញ្ជាការយោធាជាន់ខ្ពស់របស់អ៊ុយក្រែន បាននិយាយថា រុស្ស៊ី មិនបានបង្ហាញសញ្ញាណាមួយនៃចំណាប់អារម្មណ៍លើកិច្ចចរចាបញ្ចប់ជម្លោះ ដែលនាំទៅដល់កិច្ចព្រមព្រៀងសន្តិភាពនោះទេ ហើយផ្ទុយទៅវិញ ទីក្រុងមូស្គូកំពុងជំរុញផលិតកម្មសព្វាវុធ រួមទាំងគោលដៅនៃការផលិតយានដ្រូនយ៉ាងច្រើនសម្បើមចំនួន ១.០០០គ្រឿង ក្នុងមួយថ្ងៃ។

ថ្លែងប្រាប់ប្រព័ន្ធផ្សព្វផ្សាយមួយក្នុងបទសម្ភាសន៍ដែលបានចេញផ្សាយកាលពីថ្ងៃអាទិត្យ (១៨ មករា) លោកមេបញ្ជាការ Oleksandr Syrskyi បាននិយាយថា៖ «ផ្ទុយទៅវិញ អ៊ុយក្រែនមើលឃើញកំណើនយ៉ាងខ្លាំងក្លានៃសកម្មភាពយោធា កំណើននៃចំនួនទាហានវាយលុក កំណើននៃផលិតកម្មអាវុធវាយប្រហារ មីស៊ីល និងយានដ្រូន»។

លោកបន្តថា៖ បច្ចុប្បន្ន រុស្ស៊ីផលិតយានដ្រូន Shahed (ដ្រូនដែលបង្កើតដោយអ៊ីរ៉ង់) ចំនួន ៤០៤គ្រឿង ជារៀងរាល់ថ្ងៃ ក្នុងប្រភេទផ្សេងៗគ្នា និងមានផែនការបង្កើនចំនួនដ្រូនអត្តឃាតទាំងនោះ ហើយរុស្ស៊ីក៏មានគម្រោងជំរុញការផលិតដ្រូនយ៉ាងច្រើន រហូតដល់ ១.០០០ គ្រឿងក្នុងមួយថ្ងៃផងដែរ។

ក្រោយសង្រ្គាមជិត ៤ឆ្នាំមកនេះ កងកម្លាំងរុស្ស៊ី កាន់កាប់ទឹកដីអ៊ុយក្រែនប្រហែល ២០% ទៅហើយ ហើយកំពុងរុលទៅមុខយឺតៗឆ្លងកាត់ភាគខាងកើតអ៊ុយក្រែន ដោយប្រកាសពីការដណ្តើមបានភូមិថ្មីៗជាច្រើនកន្លែងក្នុងមួយសប្តាហ៍។ បណ្ដាមេដឹកនាំយោធាអ៊ុយក្រែន បានសង្កត់ធ្ងន់លើសារៈសំខាន់នៃការអភិវឌ្ឍ "យានដ្រូនស្ទាក់ចាប់" ថាជាមធ្យោបាយដ៏មានប្រសិទ្ធភាព និងសន្សំសំចៃបំផុត ក្នុងការតតាំងនឹងការវាយប្រហារយានដ្រូនឥតឈប់ឈររបស់រុស្ស៊ី ជាជាងការប្រើមីស៊ីលដែលមានតម្លៃថ្លៃ៕