កាលពីថ្ងៃអាទិត្យ (១៨ មករា) ប្រទេសស៊ីរី និងកងកម្លាំងប្រយុទ្ធជនជាតិឃឺដដ៏សំខាន់ បានឈានដល់កិច្ចព្រមព្រៀងយ៉ាងទូលំទូលាយមួយ ដើម្បីនាំយកអាជ្ញាធរស៊ីវិល និងយោធាឃឺដ ឱ្យស្ថិតនៅក្រោមការគ្រប់គ្រងរបស់រដ្ឋាភិបាលកណ្តាល ដោយបញ្ចប់ការប្រយុទ្ធដ៏បង្ហូរឈាមអស់ជាច្រើនថ្ងៃ ដែលកងទ័ពស៊ីរី បានដណ្តើមយកទឹកដីជាច្រើន រួមទាំងតំបន់ប្រេងសំខាន់ៗផងដែរ។

ប្រេសិតអាមេរិក លោក Tom Barrack បានសាទរចំពោះ «ចំណុចរបត់ដ៏សំខាន់» ប៉ុន្តែបានកត់សម្គាល់ថា នៅតែមានការងារប្រឈមជាច្រើនដែលត្រូវធ្វើ ដើម្បីសម្រេចចុងក្រោយលើសេចក្ដីលម្អិតនៃកិច្ចព្រមព្រៀងសមាហរណកម្មដ៏ទូលំទូលាយនោះ។ លក្ខខណ្ឌនៃកិច្ចព្រមព្រៀងនេះ ហាក់ដូចជាការវាយប្រហារដ៏ធំមួយសម្រាប់កងកម្លាំងប្រជាធិបតេយ្យស៊ីរី (SDF) ដឹកនាំដោយជនជាតិឃឺដ ដែលបានគ្រប់គ្រងតំបន់ពាក់កណ្តាលស្វយ័តមួយ នៅភាគឦសានស៊ីរី អស់ជាងមួយទសវត្សរ៍មកហើយ។

កាលពីមុន កងកម្លាំង SDF នេះបានជំទាស់នឹងការធ្វើសមាហរណកម្មទៅក្នុងរដ្ឋាភិបាលដឹកនាំដោយពួកអ៊ិស្លាមនិយម ដែលគ្រប់គ្រងស៊ីរី ចាប់តាំងពីលោក Bashar al-Assad ត្រូវបានផ្តួលរំលំ កាលពីចុងឆ្នាំ២០២៤មក។ គួរឱ្យដឹងថា រដ្ឋាភិបាលស៊ីរី និងកងកម្លាំង SDF បានចរចាអស់ជាច្រើនខែកាលពីឆ្នាំមុន ដើម្បីនាំយកស្ថាប័នយោធា និងស៊ីវិលដែលគ្រប់គ្រងដោយជនជាតិឃឺដ ឱ្យស្ថិតនៅក្រោមស្ថាប័នរដ្ឋស៊ីរី ត្រឹមចុងឆ្នាំ ២០២៥។

ប៉ុន្តែក្រោយពីថ្ងៃកំណត់បានកន្លងផុតទៅ ដោយមានវឌ្ឍនភាពតិចតួចប៉ុណ្ណោះ ការប៉ះទង្គិចគ្នាក៏ផ្ទុះឡើង ហើយពង្រីកទៅជាការវាយលុករបស់រដ្ឋាភិបាល លើតំបន់ដែលកាន់កាប់ដោយជនជាតិឃឺដ។ កិច្ចព្រមព្រៀងថ្ងៃអាទិត្យនោះបាននិយាយថា ការប៉ះទង្គិចគ្នាគួរតែបញ្ចប់ ប៉ុន្តែការប្រយុទ្ធគ្នាម្តងម្កាលនៅតែត្រូវបានរាយការណ៍ក្នុងតំបន់មួយចំនួន៕