សភារបស់ប្រទេសអូស្ត្រាលី នៅព្រឹកថ្ងៃចន្ទ ទី១៩ ខែមករានេះ បានត្រឡប់ទៅរកសុន្ទរកថា និងភាពស្ងប់ស្ងាត់មួយសន្ទុះសម្រាប់ជនរងគ្រោះដែលត្រូវបានសម្លាប់នៅក្នុងការបាញ់ប្រហារដ៏ធំនៅឆ្នេរ Bondi Beach ខណៈក្រុមគ្រួសារជនរងគ្រោះបានមើលពីសាលសាធារណៈ។ ខ្មាន់កាំភ្លើងពីរនាក់ ដែលនគរបាលអះអាងថាត្រូវបានបំផុសគំនិតដោយរដ្ឋអ៊ីស្លាម បានបើកការបាញ់ប្រហារនៅក្នុងព្រឹត្តិការណ៍ Hanukkah របស់ជនជាតិជ្វីហ្វនៅលើឆ្នេរBondi ដ៏ល្បីល្បាញរបស់ទីក្រុងកាលពីខែមុន ដោយបានសម្លាប់មនុស្ស១៥នាក់នៅក្នុងហេតុការណ៍ដ៏អាក្រក់បំផុតរបស់ប្រទេសក្នុងរយៈពេលជាច្រើនទសវត្សរ៍មកនេះ។

ការវាយប្រហារនេះ បានធ្វើឱ្យប្រទេសមានការភ្ញាក់ផ្អើល និងបានអំពាវនាវឲ្យមានសកម្មភាពកាន់តែតឹងរ៉ឹងលើការប្រឆាំងជ្វីហ្វនិងការគ្រប់គ្រងអាវុធ ដោយនាយករដ្ឋមន្ត្រី លោក Anthony Albanese បានសន្យាថានឹងចាត់វិធានការកាន់តែតឹងរ៉ឹងលើបញ្ហាទាំងពីរនេះ។ លោក Albanese បាននិយាយទៅកាន់សភានៅថ្ងៃចន្ទនេះថា «ខណៈយើងផ្តល់សេចក្តីស្រឡាញ់ សេចក្តីអាណិត និងសាមគ្គីភាពរបស់យើងដល់មនុស្សគ្រប់គ្នាដែលទទួលរងរបួសផ្លូវចិត្ត និងការបាត់បង់ យើងបញ្ជាក់ឱ្យច្បាស់ដល់ជនជាតិជ្វីហ្វអូស្ត្រាលីគ្រប់រូបថា អ្នកមិនឯកាទេ» បន្ទាប់ពីមានការស្ងប់ស្ងាត់មួយសន្ទុះសម្រាប់អ្នកទាំងឡាយដែលត្រូវបានសម្លាប់នៅក្នុងការវាយប្រហារ។

សមាជិកសភា ត្រូវបានកំណត់ពេលឲ្យវិលត្រឡប់ពីវិស្សមកាលរដូវក្ដៅនៅអឌ្ឍគោលខាងត្បូងនៅខែក្រោយ ប៉ុន្តែលោក Albanese បានកោះប្រជុំសភាមុនពីរសប្តាហ៍ដើម្បីរំលឹកដល់ជនរងគ្រោះ និងចាប់ផ្តើមការជជែកពិភាក្សាលើការគ្រប់គ្រងអាវុធ និងកំណែទម្រង់សុន្ទរកថាស្តីពីភាពស្អប់ខ្ពើម។