ទីផ្សារសកល នាថ្ងៃចន្ទ (១៩ មករា) នេះ ចាប់ផ្ដើមសប្ដាហ៍ថ្មីជាមួយនឹងភាពប្រែប្រួលយ៉ាងគ្រោះថ្នាក់ បន្ទាប់ពីលោកប្រធានាធិបតីអាមេរិក Donald Trump ប្ដេជ្ញាថា នឹងដំឡើងពន្ធលើប្រទេសអឺរ៉ុប ចំនួន៨ រហូតទាល់តែសហរដ្ឋអាមេរិក ទទួលបានការអនុញ្ញាតឱ្យទិញកោះហ្គ្រីនលែន (Greenland) ដោយបង្កភាពមិនប្រាកដប្រជាផ្នែកពាណិជ្ជកម្មជាថ្មី ខណៈភាគហ៊ុននិងប្រាក់ដុល្លារ ធ្លាក់ចុះយ៉ាងគំហុក។

លោក Trump បានគំរាមថា លោកនឹងដាក់ពន្ធនាំចូលបន្ថែមចំនួន ១០% ចាប់ពីថ្ងៃទី១ ខែកុម្ភៈ ខាងមុខនេះ លើទំនិញពីដាណឺម៉ាក ន័រវេស ស៊ុយអែត បារាំង អាល្លឺម៉ង់ ហូឡង់ ហ្វាំងឡង់ និងចក្រភពអង់គ្លេស ដែលនឹងកើនឡើងដល់ ២៥% នៅថ្ងៃទី១ ខែមិថុនា ប្រសិនបើពុំមានកិច្ចព្រមព្រៀងណាមួយត្រូវសម្រេចបានទេនោះ។ ភាពតានតឹងរឹតតែឡើងកម្ដៅ ដោយបណ្ដាប្រទេសអឺរ៉ុបកាលពីថ្ងៃអាទិត្យ ក៏បានខ្នះខ្នែងចាត់វិធានការតបតវិញ។

ទីផ្សារបានប្រតិកម្មយ៉ាងអាប់អួរ ដោយប្រាក់អឺរ៉ូធ្លាក់ចុះ ០,២៦% មកនៅត្រឹម ១,១៦២៨ ដុល្លារក្នុងមួយអឺរ៉ូ នៅទីផ្សារសកល ខណៈវិនិយោគិនបានសម្រុកលក់ប្រាក់ដុល្លារចេញយ៉ាងទូលំទូលាយ ដែលធ្វើឱ្យរូបិយបណ្ណគូប្រជែងសំខាន់ៗផ្សេងទៀតកើនឡើង។ នៅទីផ្សារអឺរ៉ុប ភាគហ៊ុនធំៗធ្លាក់ចុះជាង ១% ខណៈនៅអាស៊ី សន្ទស្សន៍ Nikkei របស់ជប៉ុន ក៏បានធ្លាក់ ១% ផងដែរ។ ភាគហ៊ុនអាមេរិក មិនទាន់មានប្រតិកម្មនោះទេ ដោយសារទីផ្សារបានបិទនៅថ្ងៃចន្ទនេះ ក្នុងថ្ងៃឈប់សម្រាកមួយ។

យ៉ាងណាមិញ ភាពទន់ខ្សោយនៃប្រាក់ដុល្លារ ក្នុងទីផ្សារសកល បានធ្វើឱ្យប្រាក់យ៉េនរបស់ជប៉ុន និងប្រាក់ហ្វ្រង់របស់ស្វីស មានសុវត្ថិភាព ហើយរូបិយបណ្ណគ្រីបតូ Bitcoin បានធ្លាក់ចុះជិត ៣% មកនៅត្រឹមតម្លៃក្រោម ៩៣.០០០ដុល្លារ ជុំវិញភាពតានតឹងទាំងនេះ៕