នៅថ្ងៃចន្ទ (១៩ មករា) នេះ ក្រុមពន្លត់អគ្គិភ័យនៅទីក្រុងការ៉ាជី (Karachi) របស់ប៉ាគីស្ថាន កំពុងប្រឹងប្រែងស្វែងរកមនុស្សបាត់ខ្លួនជាង ៦០នាក់ បន្ទាប់ពីអគ្គិភ័យដ៏ធំមួយ បានបំផ្លាញផ្សារទំនើបមួយកន្លែងក្នុងទីក្រុងដែលមានប្រជាជនរស់នៅច្រើនបំផុតរបស់ប៉ាគីស្ថានមួយនេះ ខណៈចំនួនអ្នកស្លាប់ដោយសារគ្រោះមហន្តរាយនេះកើនឡើងដល់ ១១នាក់។

អគ្គិភ័យបានចាប់ផ្តើមនៅយប់ថ្ងៃសៅរ៍កន្លងទៅ ក្នុងមជ្ឈមណ្ឌលផ្សារទំនើប Gul Plaza ដ៏ធំទូលាយ និងពហុជាន់ ក្នុងតំបន់ពាណិជ្ជកម្មរបស់ទីក្រុង ហើយបានឆាបឆេះអស់ជាង ២៤ម៉ោង ដែលរារាំងដល់កិច្ចប្រឹងប្រែងជួយសង្គ្រោះ នៅក្នុងតំបន់ដែលមានមនុស្សរស់នៅច្រើនកុះករ។

មន្រ្តីបានប្រាប់សារព័ត៌មានរ៉យទ័រថា ចំនួនអ្នកស្លាប់កើនឡើងដល់ ១១នាក់ ខណៈអភិបាលក្រុង Karachi លោក Murtaza Wahab បាននិយាយកាលពីថ្ងៃអាទិត្យថា មនុស្សជាង ៦០នាក់ នៅតែបាត់ខ្លួន។ ក្ដីបារម្ភកំពុងកើនឡើងកាន់តែខ្លាំងក្នុងចំណោមអ្នកស្រុក ដែលថា មានជនរងគ្រោះជាច្រើនទៀតអាចនៅតែជាប់គាំងខាងក្នុងផ្សារនោះ។

ក្រុមពន្លត់អគ្គិភ័យបាននិយាយថា កង្វះបំពង់ខ្យល់ចេញចូលនៅក្នុងអគារនេះ ដែលមានហាងជាង ១.២០០ហាង បានបណ្តាលឱ្យផ្សែងក្រាស់ៗនៅពាសពេញបរិវេណខាងក្នុងផ្សារ និងធ្វើឱ្យកិច្ចប្រឹងប្រែងដើម្បីទៅដល់អ្នកជាប់គាំងនៅខាងក្នុងមានភាពយឺតយ៉ាវ៕